ՀՀ նախկին արտգործնախարար, ԲՀԿ անդամ Վարդան Օսկանյանը «Ազատություն» ռադիոկայանին տված հարցազրույցում ասել է, որ նախորդ չորս տարիներին իշխող քաղաքական կոալիցիան ձևական է եղել:
«Քննադատությունը երբեք ինքնանպատակ չի եղել: Ես քննադատել եմ այն խնդիրները, որոնք գտել եմ, որ սխալ են արվում, դրանց լուծում չի տրվում, և 4 տարի անց կարելի է ասել, որ իմ բոլոր քննադատություններն էլ արդարացված են եղել` երկրի տնտեսական վիճակը բավական ծանր է, արտաքին քաղաքականությունում հաջողություններ չունենք, այնպես որ՝ տեսել եմ թերություններ, գտել եմ, որ որոշ հարցերում այլ կերպ պետք է վարվել և դրանց մասին խոսել եմ: Այսօր էլ իմ կարծիքը չի փոխվում: Ճիշտ է, «Բարգավաճ Հայաստան» կուսակցությունը, որին ես անդամակցել եմ, թերևս համարվում է կոալիցիայի անդամ, բայց եկեք անկեղծ լինենք` այդ կոալիցիան ձևական կոալիցիա է եղել, որովհետև իշխող կուսակցությունը բացարձակ մեծամասնություն է ունեցել և փաստորեն այս 4-5 տարիների ընթացքում արել է այն, ինչ ցանկացել է և երբեք իր գործընկերոջ` «Բարգավաճ Հայաստանի» և նունիսկ ՕԵԿ-ի ձայների կարիքը խորհրդարանում չի զգացել»,- ասել է նա:
Վ. Օսկանյանը նշել է, որ ընտրարշավի ընթացքում այն տեսակետները, որ ունեցել է, շարունակելու է հնչեցնել: Հարցին, թե եթե կոալիցիան ձևական է եղել, ԲՀԿ-ն ինչո՞ւ է տարիներ շարունակ մնացել կոալիցիայի մեջ: «Ես չեմ ուզենա մեկնաբանել մի բան, որին մասնակցություն չեմ ունեցել, բայց կարծում եմ, որ մենք արդեն հասուն պետություն ենք, հավակնում ենք եվրոպական ավելի բարձր ինտեգրացիայի: Կարծում եմ, որ այս խնդիրներին ավելի լուրջ պետք է մոտենանք: Եվ այս ընտրությունները մեզ այդ հնարավորությունը տալիս են: Այսօր քաղաքական ուժերի դասավորումն այնպես է և յուրաքանչյուրի կշիռը, որ եթե հաջորդ խորհրդարանական ընտրությունները կարողացանք ազատ, արդար անցկացնել, մենք իրոք նոր որակի խորհրդարան կունենանք, կլինեն իսկական հակակշիռներ, մենք կստիպվենք իսկական կոալիցիա կազմել»,- պատասխանել է ԲՀԿ-ական Օսկանյանը:
Հարցին, թե «Բարգավաճ Հայաստանն» իրեն պատասխանատու զգո՞ւմ է առկա իրավիճակի համար. «Մեզ մոտ ոչ միայն խորհրդարանում հակակշիռ չկա, այսինքն՝ մի կուսակցություն ունի բացարձակ մեծամասնություն, այլև քաղաքական համակարգում չկա»:
