Ընտրական գործընթացների վերաբերյալ Հատուկ քննչական ծառայությանը (ՀՔԾ) վերապահված հանցագործությունների քննության հետ կապված մի շարք հարցեր են քննարկվել Հայաստանում Միացյալ Նահանգների դեսպանատան անդրազգային հանցավորության հարցերով պատասխանատու Դենիել Հեսթինգսի և ԵԱՀԿ-ի երևանյան գրասենյակի ղեկավարի տեղակալ Կարել Հովսթրայի գլխավորած պատվիրակության հետ ՀՔԾ-ի պետ Անդրանիկ Միրզոյանի հանդիպման ժամանակ։
ՀՔԾ մամուլի ծառայությունից «Առաջին լրատվական»-ին հայտնում են, որ Միրզոյանը տեղեկացրել է, որ ընտրական գործընթացների հետ կապված գործող Քրեական օրենսգրքում նախատեսված է 12 հանցակազմ, որոնցից իր գլխավորած ծառայության ենթակայությանը վերապահվել է 4-ը, մասնավորապես` ընտրական իրավունքի իրականացմանը, ընտրական հանձնաժողովների աշխատանքներին կամ ընտրությանը մասնակցող անձանց լիազորությունների իրականացմանը խոչընդոտելը, ընտրությունների կամ քվեարկության արդյունքները կեղծելը, կեղծ ընտրական քվեաթերթիկներ կամ քվեարկության ծրարներ պատրաստելը, ընտրողի կամքի ազատ իրականացմանը խոչընդոտելը:
Հյուրերի խնդրանքով Միրզոյանը անդրադարձել է ընտրակաշառքի դեպքերին, ընտրական գործընթացների վերաբերյալ հաղորդումների քննարկման կարգին, քրեական գործ հարուցելու առիթների և հիմքերի վերաբերյալ հարցերին:
Անդրանիկ Միրզոյանը վստահեցրել է, որ ՀՔԾ-ն ունի կամք և վճռականություն` իր լիազորությունների շրջանակներում պաշտպանելու քաղաքացիների ընտրական իրավունքը և ընտրախախտում թույլ տված անձանց գործողություններին համարժեք քրեաիրավական գնահատական տալու: Շեշտվել է նաև, որ Հատուկ քննչական ծառայությունը թույլատրելի սահմաններում պատրաստակամ է ապահովելու հրապարակայնությունը:
ՀՔԾ-ի պետը պատրաստակամություն է հայտնել պետական և ոչ պետական մարմինների, հասարակական կազմակերպությունների և լրատվամիջոցների հետ համագործակցության հարցում` ընտրությունների բնականոն անցկացման գործընթացն ապահովելու համար:
