Դատավորին պատասխանատվության ենթարկելը կարող է դաս լինել այլ դատավորների համար: Այսօր «Առաջին լրատվական»-ի հետ զրույցում նման տեսակետ հայտնեց փաստաբան Սեդա Սաֆարյանը` անդրադառնալով երեք դատավորներին պատասխանատվության ենթարկելու արդարադատության խորհրդի որոշմանը:
Թեև փաստաբանը չգիտեր, թե որ դատավորները պետք է պատասխանատվության ենթարկվեն, ասաց, որ Հայաստանում նաև կարգապահական վարույթ հարուցելու և պատասխանատվության ենթարկելու հարցերն այդքան օբյեկտիվ չեն: Ըստ նրա` պետք է լինեն չափորոշիչներ, թե ում նկատմամբ է կիրառելի կարգապահական տույժ և երբ: «Լինում են շատ անարդար դեպքեր, բայց համապատասխան տույժեր չեն կիրառվում: Ես համոզված չեմ, որ այս գործերը արդարացիորեն են արժանացել նախատինքի: Իսկ ընդհանրապես յուրաքանչյուր դատավորի կատարած մեղքը, եթե որոշմամբ գիտակցվի, այսինքն` քննարկման առարկա դառնա, նրան ասեն, որ սխալ է գործել, իհարկե, մարդկանց և կողքի դատավորի համար դաս կլինի, դաս կստանա այդ ամենից և գուցե նման սխալներ թույլ չտա, այդ տեսանկյունից ողջունելի է, որ նկատում են դատավորների թույլ տված խախտումները»,- կարծիք հայտնեց փաստաբան Սեդա Սաֆարյանը:
Հիշեցնենք, որ ՀՀ արդարադատության խորհուրդը որոշել է կարգապահական պատասխանատվության ենթարկել ՀՀ վերաքննիչ քրեական դատարանի դատավորներ Մանուշակ Պետրոսյանին, Մհեր Արղամանյանին և Գրիշա Մելիք-Սարգսյանին: Խոսքը վերաբերում է համաներմամբ ազատ արձակվելու ենթակա մի դատապարտյալի դեմ կայացված դատական ակտին, որի վերաբերյալ ՀՀ վճռաբեկ դատարանի նախագահի կողմից Կարգապահական հանձնաժողովին հասցեագրված գրությունն էլ ակտը կայացրած դատավորների նկատմամբ կարգապահական վարույթ հարուցելու առիթ է դարձել:
