ԱՄՆ դաշնային դատարանը «Հուտարի» խմբավորման 7 անդամների վրայից հանել է առավել ծանր մեղադրանքները: Վերջիններս մեղադրվում էին զինված ապստամբություն կազմակերպելու մեջ: Այս մասին հայտնում է Associated Press-ը:
Մեղադրյալների դեմ գլխավոր ապացույցը նրանց խոսակցությունների ձայնագրությունն էր, սակայն դատավոր Վիկտորյա Ռոբերթսը համարել է, որ այն ատելությունը, որով նրանք խոսել են իրավապահ մարմինների մասին, չի կարող նրանց մեղադրանք առաջադրելու հիմք ծառայել այն բանի համար, որ նրանք պատրաստվել են կառավարության դեմ ապստամբություն կազմակերպել:
Խմբավորման 5 անդամների վրայից հանվել է մեղադրանքն ամբողջությամբ: Խմբի ղեկավար Դեյվիդ Սթունին ու նրա որդուն` Ջոշուային, ապօրինի զենք պահելու մեղադրանք է առաջադրվել:
Գործընթացը սկսվել է փետրվարի 13-ին: Հաջորդ դատական նիստը կկայանա մարտի 29-ին: Ինչպես նկատում է The New York Times-ը, մեղադրանքների հաստատման դեպքում նրանց սպառնում էր ցմահ բանտարկություն:
«Հուտարիի» անդամներին անվանում էին «քրիստոնյա զինյալների» խմբավորում:
