«Գարնանը պետք է ազատվել մուգ գույներից և փորձել կրել ավելի վառ գույներ։ Եթե խուսափում եք հագնվել նման կերպ, կարելի է օգտագործել պարզապես վառ գույնի աքսեսուարներ՝ շարֆեր, պայուսակներ կամ կոշիկներ։ Սա հենց առաջին տենդենցն է, որը սկսվել է դեռևս անցյալ տարվանից»,- այս մասին «Առաջին լրատվական»-ի հետ զրույցում ասաց «Ատեքս» նորաձևության կենտրոնի տնօրեն Կարինե Դնոյանը։ Ըստ նրա՝ բացի նրանից, որ նորաձև են համարվում վառ գույները, կարելի է օգտագործել նաև այդ գույների կոնտրաստը. «Նման համադրություն կարող են օգտագործել ավելի ազատ մարդիկ։ Նրանք, ովքեր կաշկանդվում են վառ գույներից, կարող են օգտագործել միայն մի գույն, քանի որ դա պարտադրանք չէ, այլ պարզապես տենդենց է»։
Երկրորդը ազատ կամ բոհեմային ոճն է։ Այն և´ 70-ականների ոճն է, և´ գնչուական մոտիվների վերադարձը. «Այս ոճը ավելի շատ սիրում են երիտասարդները կամ ստեղծագործող մարդիկ։ Բաղկացած է երկար կիսաշրջազգեստներից՝ տարբեր կտորներից, հետաքրքիր դաջվածքներով կամ գործվածքներով։ Կարելի է համադրել կարճ բաճկոնների, շարֆերի կամ վզնոցների հետ։ Այսօր շարֆերը շատ ակտուալ են, սակայն հիմնականում ջինսերի հետ են օգտագործվում։ Աղջիկների համար կիսաշրջազգեստները ավելի նախընտրելի են»։
Մասնագետը նշեց, որ երրորդն ավելի շատ հակատենդեց է. «Այն 60-ականների մինիմալիզմ կոչվող ոճն է։ Հասարակ ֆորմայով շորիկներ են։ Կարող են և´ վառ գույներով լինել, և՝ ոչ։ Այս ոճի հագուստները չունեն դետալներ՝ պարզ շորիկներ են, որոնց պետք է արտահայտել գույներով»։
Կ. Դնոյանը նշեց նաև, որ այս գարնանը շատ նորաձև են կաշվե հագուստներն ու մեծ չափերի աքսեսուարները. «Սակայն ոչ կաշվե բաճկոններ, որոնք սովորաբար կրում են։ Կաշին կարող ենք տեսնել այնտեղ, որտեղ դեռ չենք տեսել՝ ձեռքերին, գրպաններին կամ վերնաշապիկների վրա։ Աքսեսուարները՝ և´ ականջօղերը, և´ ճարմանդները, և´ վզնոցները նախընտրելի է, որ մեծ չափերի լինեն։ Լավ կլինի, որ ձեռքի աշխատանքի տպավորություն թողնեն, սակայն պետք է կրեն առանձին։ Շատ նորաձև են նաև միջին չափի պայուսակները»։
Խոսելով երեկոյան զգեստների մասին՝ մոդելավորողը փաստեց, որ ավելի նարաձև է ռետրո ոճը. «Կարելի է հագնել ուղիղ շորիկներ՝ արտահայտված դեկորով։ Իրենց ձևով հասարակ են, բայց զարդանախշերը շատ են։ Այս ոճի հետ հնարավոր է կրել նաև գլխազարդեր՝ աբադոկ կամ ճակատի վրա անցկացվող ժապավեն։ Գլխարկը շատ գեղեցիկ կլինի օգտագործել բոհեմ ոճի հետ։ 60-ականների ոճի հետ ավելի շատ ընդունված է օգտագործել շարֆեր և վերևի մասը մի քիչ ձգված ակնոցներ»։
Մասնագետը տղաներին՝ ավելի նորաձև լինելու համար, խորհուրդ տվեց հագնել նեղ տաբատներ, փոքր տպավորություն թողնող բաճկոններ. «Սա իհարկե դոգմա չէ։ Ուղղակի ամեն մեկը պետք է այն ոճն ընտրի, որը հարմար է իր կազմվածքին,- ապա հավելեց,- Չպետք է դառնալ նորձևության զոհը։ Հիմա ավելի նորաձև են ոճային մարդիկ, քան նորաձևությանը հետևողները»։