Սենատոր Ռենդ Պոլը՝ կոնգրեսական Ռոն Պոլի որդին, արգելափակել է Իրանի դեմ նոր պատժամիջոցներ մտցնելու բանաձևի ընդունումը: Այս մասին հաղորդում է Politico-ն:
Սենատում դեմոկրատական մեծամասնության առաջնորդ Հարրի Ռիդը մտադիր էր արագացված կարգով քվեարկություն անցկացնել: Դրա համար անհրաժեշտ էր, որպեսզի բանաձևի դեմ առարկություններ չլինեին: Այդ պարագայում այն կընդունվեր բանավոր քվեարկությամբ` առանց քննարկումների և փոփոխությունների: Սակայն Ռենդ Պոլը փաստաթղթին դեմ է արտահայտվել և փոփոխություն է առաջարկել:
Բանաձևն արգելում է սարքավորումներ կամ տեխնոլոգիաներ տրամադրել Իրանին, որոնք կարող են օգտագործվել մարդու իրավունքների ոտնահարման համար: Մասնավորապես՝ հսկողության սարքավորումներ, ռադիոհաղորդումների խլացուցիչներ, ինչպես նաև՝ արցունքաբեր գազ, ռետինե փափուշտներ և այլն: Ինչպես ընգծել է Ռիդը, բանաձևում որևէ հիշատակում չկա պատերազմի մասին:
Իր նախընտրական քարոզարշավի ընթացքում Ռոն Պոլը, ով պայքարում է նախագահի թեկնածության համար, արտահայտվել է այլ երկրների ներքին գործերին խառնվելու դեմ: Կոնգրեսականի կարծիքով՝ Իրանի հետ հարաբերությունները կարգավորելու համար լավ կլիներ բարեկամություն առաջարկել, այլ ոչ թե նոր պատժամիջոցներ առաջ քաշել:
Ավելի վաղ ԱՄՆ–ն արդեն Թեհրանի դեմ պատժամիջոցներ էր կիրառել: Իրանին կասկածում են միջուկային զենք ստեղծելու մեջ: Երկրի իշխանությունները վստահեցնում են, որ իրենց միջուկային հետազոտությունները բացարձակապես խաղաղ բնույթ են կրում:
