Հայաստանի առջև ծառացած ամենաբարդ խնդիրը մոդեռն երկիր կառուցելն է, որովհետև մի ոտքով խրված ենք արևելյան աղբի մեջ: Քաղաքական ու միջազգային հետազոտությունների հայկական կենտրոնի՝ այսօր կազմակերպած քաղաքական քննարկման ժամանակ այս մասին ասաց ՀՅԴ պատգամավոր Լիլիթ Գալստյանը:
«Բոլոր կուսակցությունների ցուցակներն արտահայտում են այն փիլիսոփայությունը, որով նրանք պատրաստվում են առաջնորդվել առաջիկա հինգ տարիներին: Հայաստանում քաղաքական ինստիտուտի կայացվածության մասին խոսակցություններն ուղղակի ծիծաղ են առաջացնում և քաղաքական սատիրայի շրջանակներից են:
Նախընտրական աղբն արդեն իսկ լցվել է շուրջբոլորը՝ սկսած բաժանվող մուրաբաներից, ակնոցներից, ատամի պլոմբներից ու մնացածից: Իրականում սա ողբերգություն է: Հայ ժողովրդի մի մասը սպասում է 5000-ից 10000 դրամանոց կաշառքներին, ոմանք ապատիայի մեջ են: Այս զինանոցով մարտունակ երկիր կառուցելն ուղղակի անհնարին է: Մեր միակ լավագույն ռեսուրսը կայուն պետականություն ունենալն է»,- նշեց նա:
Պատգամավորի խոսքով՝ քաղաքական հիմնական պայքարն առաջիկա ընտրություններին գնալու է ՀՀԿ-ի ու ԲՀԿ-ի միջև: «Այնուամենայնիվ, Հայաստանում կան ինքնորոշված քաղաքացիներ, որոնց հետ էլ պետք է կապել երկրի ապագան, և որոնք չեն տրվելու ընտրակաշառքին: Գրեթե բոլոր կուսակցությունների կարգախոսներում կա «հավատ» բառը, բայց ցավալին այն է, որ հասարակության զգալի հատվածը կորցրել է իր հավատը»,- ամփոփեց Լիլիթ Գալստյանը:
