ԱՄՆ հանրապետական կուսակցության նախագահի թեկնածու Նյութ Գինգրիչը, որի վարկանիշի անկման հետ նվազել են նրա նախընտրական քարոզարշավի եկամուտները, որոշել է այդ խնդիրը լուծել տարօրինակ ձևով. նա իր հետ նկարվել ցանկացողներից կվերցնի 50 դոլար:
Ինչպես հաղորդում է The huffington Post-ը, նոր մարտավարությունը փորձարկվել է մարտի 26-ին Դելավեր նահանգի նախընտրական միջոցառման ժամանակ և բավական հաջող է անցել:
«Որոշ թեկնածուներ միջոցառումներ են անցկացնում միջոցներ հավաքելու համար բացառապես Ուոլ Սրիթում և իրենց հետ նկարվելու համար վերցնում են յուրաքանչյուրից 2500 դոլար: Մենք որոշել ենք այլ ճանապարհով գնալ և խնդրում ենք մեր կողմնակիցներին խորհրդանշական հանգանակություն կատարել Գինգրիչի՝ երկրում կատարած այցերի ժամանակ»,- մեկնաբանել է Գինգրիչի թիմի անդամներից մեկը:
Սակայն նրա խոսքերով՝ այլ միջոցներ էլ կան հանգանակություններ կատարելու համար. օրինակ գնել մարզաշապիկ, գլխարկ, բաժակ և նույնիսկ պիջակ շան համար՝ թեկնածուի նախընտրական խորհրդանշանով:
Վերին ֆինանսական հաշվետվության համաձայն՝ Գինգրիչի շտաբը այս պահին ունի մոտ 1.6 մլն դոլարի պարտք: Փետրվարին նրան հաջողվեց հավաքել ընդամենը 2.6 մլն դոլար հանգանակություն այն դեպքում, երբ հունվարին այդ գումարը կազմում էր 5.6 մլն դոլար:
Վերջին շրջանում Գինգրիչը, որը մի ժամանակ ֆավորիտ էր համարվում հանրապետականների մրցավազքում, սկսել է արագ կորցնել ժողովրդականությունը: Շաբաթ օրը Լուիզիանայում տեղի ունեցած փրայմերիզում նա զբաղեցրեց միայն երրորդ տեղը՝ զիջելով Միթ Ռոմնիին և Ռիք Սանտորումին:
