Թուրքիան շարունակում է ջանքեր գործադրել, որպեսզի ԼՂ հակամարտության կարգավորման նախաձեռնությունն անցնի թուրք-ամերիկյան տանդեմին: «Առաջին լրատվական»-ի հետ զրույցում նման տեսակետ հայտնեց ԼՂ նախկին արտգործնախարար Արման Մելիքյանը՝ անդրադառնալով Սեուլում կայացող Միջուկային անվտանգության երկրորդ գագաթնաժողովին Թուրքիայի վարչապետ Էրդողանի այն հայտարարությանը, թե ԵԱՀԿ Մինսկի խմբի գործունեությունը դադարում է արդյունավետ լինել:
«Թուրքական դիրքորոշումը նույնն է մնացել: Խոսակցությունները, որ ԵԱՀԿ Մինսկի խմբի շրջանակներում Թուրքիան պետք է փոխարինի Ֆրանսիային, բանակցություններ վարի Ադրբեջանի հետ, ցույց են տալիս, որ Թուրքիան միշտ էլ այն կարծիքին է եղել, թե համանախագահներն Ադրբեջանին ասելիք չունեն: Սա է ձևաչափը, և եթե այնպես ստացվի, որ Հայաստանի ու Ադրբեջանի ղեկավարների հաջորդ հանդիպումը Թուրքիայի նախաձեռնությամբ տեղի ունենա Վաշինգտոնում, դա բավական հետաքրքրական շրջադարձ կլինի»,- ասաց նախկին պաշտոնյան:
Ամփոփելով՝ Արման Մելիքյանը չբացառեց, որ Թուրքիան մի օր իսկապես կարող է ներգրավվել ԼՂ կարգավորման գործընթացի մեջ: «Քանի Հայաստանը սեփական արտաքին քաղաքականություն չունի, ես որևէ բան չեմ կարող բացառել: Ես գտնում եմ, որ մեր երկրի համար կարևոր որոշումներն ընդունվում են Հայաստանի սահմաններից դուրս»,- ասաց նա:
