Ինչպես տեղեկացնում է SecurityLab-ը, ԱՄՆ պաշտպանության ոլորտի գիտական հետազոտությունների հեռանկարային պլանավորման գործակալությունը՝ DARPA-ն, պատրաստվում է անցկացնել կեղծ հանցագործներ գտնելու մրցույթ:
TAG Challenge մրցույթը 12 ժամվա ընթացքում կանցկացվի ԱՄՆ երկու քաղաքներում՝ Վաշինգտոնում և Նյու Յորքում, ինչպես նաև եվրոպական երեք քաղաքներում՝ Ստոկհոլմում, Լոնդոնում և Բրատիսլավայում:
Մրցույթը նախատեսված է ուսումնասիրելու համար քաղաքացիների և իրավապահ ու հետախուզական մարմինների համագործակցության հնարավորությունները:
Ըստ մրցույթի կազմակերպիչների՝ շատ դեպքերում ոստիկանությունը հետախուզական աշխատանքները դադարեցնում է մարդկանց և ռեսուրսների ոչ բավարար լինելու պատճառով, և դա այն դեպքում, երբ, ըստ DARPA-ի, բնակչությունը կարող է էական աջակցություն ցուցաբերել իրավապահ մարմիններին:
Ըստ մրցույթի պայմանների՝ մարտի 31-ին TAG Challenge պաշտոնական կայքում կհրապարակվի 5 մարդու լուսանկար, որոնք հետախուզման մեջ գտնվող գողերի դերում կլինեն: Որոնման ընթացքում թույլատրվում է օգտագործել բոլոր առկա միջոցները, այդ թվում՝ ԶԼՄ-ներ, սոցիալական ցանցեր և այլ ինտերնետ ծառայություններ:
Հաղթանակի համար անհրաժեշտ է լուսանկարել հետախուզվողներին և նկարները տեղադրել խաղի կայքում: