Հակասիրիական դիրքորոշում ունեցող արևմտյան երկրները կեղծավոր կերպով քողարկվում են մարդու իրավունքների պաշտպանության կարգախոսների տակ, բայց «նրանց չեն հետաքրքրում այն պետությունները, որոնք չունեն նավթային և այլ բնական ռեսուրսներ»: Այս մասին հայտարարել է Իրանի նախագահ Մահմուդ Ահմադինեժադը:
Ահմադինեժադը քննադատել է ԱՄՆ-ի և որոշ արաբական երկրների քաղաքականությունը, որոնք Դամասկոսին կոչ են անում «հետևել ժողովրդավարության սկզբունքներին»:
«Ներկա պայմաններում այս կոչը նշանակում է, որ չպետք է պայքարել անօրինական զինված խմբավորումների դեմ, պետք է թույլ տալ նրանց սպանել անմեղ մարդկանց և զինծառայողների, սկուտեղի վրա մատուցել նրանց քո երկիրը»,- ասել է Ահմադինեժեդը՝ Սիրիայի նախագահի հատուկ ներկայացուցիչ Ֆեիսալ Մեկղդադամի հետ հանդիպման ժամանակ:
Ահմադինեժադը նաև հավելել է, որ արևմտյան երկրների կողմից ստեղծված հակասիրիական շարժումն «ուղղված է սիոնական վարչակարգի փրկությանը»:
Նշենք, որ պաշտոնական Թեհրանը Սիրիային համարում է իր մերձավոր դաշնակիցը և վերջին շրջանում բազմիցս նշել է այդ երկրի գործերին օտար միջամտության անթույլատրելիության մասին:
