«Հաճախ հորինվածքներ են հայտարարում, թե ԲՀԿ-ն կսատարի մարքսիստներին: Սա կատարյալ խաբեբայություն է. իմ կարգավիճակի մասին հստակ հայտարարում եմ` ազատ խաղացող»,- այս մասին այսօր ասուլիսի սկզբում հայտարարեց Մարքսիստական կուսակցության նախագահ Դավիթ Հակոբյանը:
Նա հայտարարեց, որ ոչ մի կուսակցությունից որևէ ֆինանսավորում չի ստացել և դրա կարիքն էլ չունի. «Կոչ եմ անում հանձնաժողովի անդամ ունեցող կուսակցություններին լինել պարկեշտ և իրենց հանձնաժողովի անդամներին հրահանգել առաքինի պահվածք, չգողանալ ընտրաթերթիկներն այնպես, ինչպես դա արվեց 2007-ին, երբ 41-ում հաղթողը ես էի»:
Այս տարի ևս Դավիթ Հակոբյանը առաջադրվել է 41-րդ ընտրատարածքում և համոզված է, որ ժողովուրդն անպայման կընտրի իրեն: Անդրադառնալով համամասնական ընտրակարգին՝ նա ասաց, որ դա ամենահանցագործ ընտրական կարգն է, իսկ առաջադրված պատգամավորության թեկնածուների 70 տոկոսը չունի գաղափարական ցենզուրա:
Խոսելով ընտրացուցակների մասին՝ նա ասաց, որ ՀՀԿ-ի ցուցակի պատկերն այսպիսին է` ուրացողից մինչև շնացող. « Փոխարենը ողջունում եմ ՀԱԿ-ի համառությունը: Նրանք արդեն 5 տարի անգլիական բուլդոգի նման կառչած մնացին հրապարակախոսական ինստիտուտի բարձունքից, և ես դա ողջունում եմ. միայն Լևոն Տեր-Պետրոսյանն արժե 10 հատ մանդատավոր»:
Դավիթ Հակոբյանը նաև նշեց, որ եթե չընտրվի որպես պատգամավոր, մյուս տարի կառաջադրվի որպես նախագահի թեկնածու:
