Թերթը մանրամասներ է ներկայացնում Wikileaks կայքում հրապարակված ամերիկյան դիվանագիտության հերթական գաղտնի փաստաթղթից: Դրանից պարզ է դառնում, որ Թուրքիայում գտնվող Ինջիրլիքի ռազմաբազան փախադրակետ է հանդիսացել Մերձավոր Արևելքից, Աֆղանստանից և իսլամական այլ երկրներից իսլամական ահաբեկչությանը աջակցելու մեջ մեղադրվող անձանց ամերիկյան Գուանտանամո բանտ տեղափոխելու համար:
Փաստաթղթում, որը թվագրված է՝ 2006 թ. հունիսի 8, Թուրքիայում Միացյալ Նահանգների դեսպան Ռոս Վիլսոնը այդ երկիրը ներկայացնում է որպես «ահաբեկչության դեմ պայքարի» կարևոր դաշնակից և կարևոր հենակետ Իրաքում ԱՄՆ վարած պատերազմի համար:
Միաժամանակ փաստաթղթում ամերիկյան դիվանագետը մեջբերում է թուրքական որոշ պաշտոնյաների հայտարարությունները, որոնք բացահայտ դեմ են արտահայտվել «գաղտնի փոխադրումներին»: Ինչպես 2006 թ. հունիսի 14-ին հայտարարել է Թուրքիայի արտաքին գործերի նախարարության խոսնակը՝ «Թուրքիայի կառավարությունը և պետությունը երբեք մասնակից չեն եղել դրան («գաղտնի փոխադրումներին») և երբեք չեն էլ լինի»:
Թերթը նաև հիշեցնում է, որ Եվրոպայի Խորհրդում ժամանակին տարածվել էր մի փաստաթուղթ, որում 14 եվրոպական երկրներ մեղադրվում էին ահաբեկիչներին իրենց տարածքներով անօրինական փոխադրելու մեջ: Թուրքիան դրանց թվում էր: