Ամերիկացիների մեծամասնությունը չի հավատում, որ Գերագույն դատարանն անկողմնակալ որոշում կկայացնի առողջապահության ոլորտում բարեփոխումներ իրականացնելու համար: Այս մասին են վկայում երկրում անցկացված սոցհարցումները, որոնց արդյունքները հրապարակում է The Hill-ը: Սոցհարցումն անցկացվել է այն ամերիկացիների շրջանում, որոնք մասնակցելու են ընտրություններին:
Հարցվածների միայն 27 %-ն է հայտարարել, որ դատարանը, իրենց կարծիքով, անկողմնակալ որոշում կկայացնի` հավատարիմ մնալով օրենքի տառին, իսկ 56 %-ը գտնում է, որ դատավորները որոշում կկայացնեն իրենց սեփական քաղաքական տեսակետներից ելնելով: Դրա հետ մեկտեղ ընտրողների 50 %-ը ցանկություն է հայտնել, որ Գերագույն դատարանը մերժի առողջապահության ոլորտում բարեփոխումների մասին օրենքը, որը առաջադրել է Բարաք Օբաման: Հարցվածների միայն 42 %-ն է կողմ, որ դատարանը հավանություն տա օրինագծին:
Նշենք, որ բարեփոխմանը կողմնակից են կանանց 52%-ը և՝ տղամարդկանց 48 %-ը: Բարեփոխումը հատկապես պաշտպանություն է գտել աֆրոամերիկացիների (74 %), դեմոկրատների (71 %) և լիբերալների (75 %) շրջանում:
Դատական լսումները` օրինագծի Սահմանադրությանը համապատասխանելու վերաբերյալ, սկսվել են մարտի 26-ից: Ավելի վիճահարույց է օրինագծի այն կետը, որը պարտադրում է բոլոր ամերիկացիներին գնել բժշկական ապահովագրություն (նախկինում նրանք դրա համար պետությունից նպաստ էին ստանում): Այս բարեփոխումը մեծ դժգոհություն է առաջացրել հանրապետականների շրջանում, որոնք գտնում են, որ պետությունն իրավունք չունի խառնվելու կյանքի այն ոլորտին, որտեղ քաղաքացիներն իրենք պետք է որոշում կայացնեն:
