Թուրքական Haberler.com կայքի փոխանցմամբ՝ գերմանական Deutsche Welle-ն ուսումնասիրել է Թուրքիայի զբոսաշրջային ոլորտը և եկել այն եզրահանգման, որ դրա վրա մեծապես ազդում են արտաքին քաղաքական զարգացումները:
Մասնավորապես, նվազում է Թուրքիայի հետ խնդիրներ ունեցող երկրներից զբոսաշրջիկների ներհոսքը: Դա վերաբերում է Ֆրանսիային, Իսրայելին, Սիրիային և Իրանին:
Օրինակ այս տարվա հունվարին Ֆրանսիայից Թուրքիա է ժամանել 21,582 զբոսաշրջիկ, երբ նախորդ տարվա նույն ամսին այդ ցուցանիշը կազմել է 23,092: Այսինքն՝ գրանցվել է զբոսաշրջիկների ներհոսքի 6.5 տոկոսանոց անկում: Հունվարին Իսրայելից ժամանած զբոսաշրջիկների թիվը նվազել է 23.39 տոկոսով:
Նախորդ տարվա հունվարին Սիրիայից Թուրքիա էր ժամանել 64,000 զբոսաշրջիկ, իսկ այս տարվա հունվարին այդ ցուցանիշն անկում է ապրել 16.69 տոկոսով՝ նվազելով մինչև 53,000-ի: Իրանի պարագայում էլ զբոսաշրջիկների թիվը նվազել է 17.85 տոկոսով:
