Ի դեմս ՀՀԿ-ի՝ «Ազատ դեմոկրատներ»-ը տեսնում է իրենց հիմնական մրցակցին. այսօր ասուլիսի ժամանակ նման հայտարարություն արեց «Ազատ դեմոկրատներ»-ի վարչության անդամ Արմեն Առաքելյանը՝ նշելով, որ ՀՀԿ-ն շատ հստակ գիտի իր ընտրողին՝ 5-10 ձայնի ճշտությամբ, և ընտրակաշառքի մեխանիզմներն արդեն աշխատեցնում են: Նա հավելեց՝ սակայն ամեն ինչ չէ, որ լուծվում է դրամի միջոցով. ընդդիմադիր ընտրազանգվածը Հայաստանում միշտ ավելի շատ է եղել` մոտ 60-70%:
Ա. Առաքելյանի խոսքով՝ Հայաստանի իշխանություններն արդեն օգտագործում են իշխանական լծակները, բայց մյուս քաղաքական ուժերը հաշվի են առնում դա:
«Հանրապետականն իրեն մեկտեղում է պետության հետ»,- ասաց Ա. Առաքելյանը` հավելելով, որ քարոզարշավի շրջանակներում տեղավորվող միջոցառումը ներկայացվում է որպես պետական միջոցառում՝ էլ չասած բարեգործական ակցիաների մասին, որոնք ուղղակի կաշառք են:
«Ազատ դեմոկրատներ»-ի վարչության անդամի բնորոշմամբ` բացարձակ անհասկանալի է ԲՀԿ դիրքորոշումը, իսկ ՕԵԿ-ը «ակումբային մակարդակով ՀՀԿ կցորդն ու նրա դուստր ձեռնարկությունն է, ու բնական է՝ պետք է գովերգեն»:
ՀՀԿ պատգամավոր Արտակ Դավթյանի գնահատմամբ` ներկայում հարաբերական անդորր է՝ փոթորկից առաջ. կուսակցությունները պատրաստվում են առաջիկա ճակատամարտին` ընտրություններին:
Նրա կարծիքով՝ ՀՀԿ համար բավականին լավ հեռանկարներ են բացվում, այս տարիների ընթացքում կուսակցության գործունեությունը հրապարակային է եղել, և՛ լավ, և՛ վատ ցուցանիշները իրենցն են, և իրենք պատասխանատվությունից չեն խորշում:
«Բոլոր ուժերին դիտարկում եմ որպես մրցակից: Ուղղակի խնդիրն այն է, որ համեմատության մեջ իրականում անցկացվեն այնպիսի ընտրությունններ, որոնք կասկածներ չհարուցեն»,- ասաց Ա. Դավթյանը` նշելով, որ ընտրակաշառքի դեմ պայքարելու են բանական խոսքով:
Պատասխանելով «Առաջին լրատվական»-ի հարցին` նախորդ հինգ տարիներին ՀՀԿ-ն իր խոստումները չկարողացավ կատարել, այժմ ինչպե՞ս է պատրաստվում «բանական խոսքը» հասցնել ժողովրդին, Ա. Դավթյանը նշեց՝ պետք է հրապարակեն, թե ինչու նախանշված ցուցանիշներին չհասան՝ դա պայմանավորելով օբյեկտիվ պատճառներով. ճգնաժամ, ռուս-վրացական պատերազմ, աշխարհում տեղի ունեցող զարգացումներ։ Սակայն, ըստ նրա, կարողացան ապահովել ներքին կայունություն.
«Կներկայացնենք և կփորձենք ներկայացնել, թե ընդդիմախոսները ինչ են առաջարկում: Շատ ավելի վատ ցուցանիշներ կունենայինք, եթե չկատարեինք այն քայլերը, որ արվել են»:
