Օրերս Հելսինկյան քաղաքացիական ասամբլեայի Վանաձորի գրասենյակը հայտարարություն էր տարածել, որ 2012 թվականի մարտի 22-ին ՀՀ Լոռու մարզի մարզպետ Արթուր Նալբանդյանը այցելել է Վանաձոր քաղաքի մի շարք միջնակարգ դպրոցներ և ընդհանուր հանդիպում ունենալով ուսուցիչների և աշխատակազմի հետ` կոչ է արել առաջիկա խորհրդարանական ընտրություններին քվեարկել Հայաստանի հանրապետական կուսակցության օգտին, որով խախտվում են ՀՀ ընտրական օրենսգրքի 22-րդ և 18-րդ հոդվածները: Սակայն մարզպետը մեզ հետ զրույցում հերքեց այդ տեղեկատվությունը:
– Այս ամենը իրականությանը չի համապատասխանում: Իսկ ո՞վ է ասել, որ մարզպետը դպրոց չի գնալու, ո՞վ է ներկա եղել, որ մարզպետը նման քարոզ է արել կամ ընտրությունների մասին ընդհանրապես խոսել է:
– Սա դավադրությո՞ւն է Ձեր դեմ:
– Այդ հարցերն իրենց ուղղեք, թե որտեղից են վերցրել այդ տեղեկատվությունը:
– Վերջին օրերին Դուք դպրոցներ ընդհանրապե՞ս չեք այցելել:
– Ես աշխատում եմ որքան հնարավոր է արագ մեր բոլոր ենթակառույցներում լինեմ: Երևի Դուք մոռանում եք, որ ես ընդամենը յոթ ամիս եմ մարզպետ, և իմ գործառույթների մեջ է մտնում արագ գոնե մեր ենթակառույցների հիմնախնդիրներին ծանոթանալը: Եթե ընտրությունները նշանակված են առաջիկա օրերին, ուրեմն մենք չե՞նք աշխատելու ընդհանրապես:
– Հնարավո՞ր է Ձեր` դպրոցներում գտնվելու ժամանակ է օրենսգրքի պահանջների խախտում արձանագրել ՀՔԱ-ն:
– Չեմ կարծում, և երևի նույն հարցը Հելսինկյան գրասենյակին տաք` ինչից է ենթադրություններ արել:
– Դե, դեռ պաշտոնական քարոզարշավի մեկնարկից առաջ է, նման հանդիպումների ժամանակ խախտվում են ՀՀ ընտրական օրենսգրքի 22-րդ և 18-րդ հոդվածները:
– Հիմա ես մտածեմ, տեսնեմ` ով ինչ է մտածելու իմ` ենթակառույց հաճախելուց հետո, չգնա՞մ ընդհանրապես:
– Իսկ ընդհանրապես մարզում ինչպիսի՞ նախընտրական տրամադրություններ են:
– Շատ նորմալ, ոչ մի նախընտրական լարվածություն չկա, ամեն ինչ իր հունով գնում է:
– Վանաձորում առաջադրվել են Աշոտ Մանուկյանը, Վիկտոր Դալլաքյանը, Զոհրաբ Թորոսյանը, Կարեն Սարիբեկյանը… Վիկտոր Դալլաքյանի օգտի՞ն եք աշխատելու:
– Քանի դեռ քարոզարշավը չի սկսվել, մեր մարզում որևէ լարվածություն չկա, չնայած չեմ պատկերացնում, որ քարոզարշավի հետ լարվածությունը փոքր-ինչ կմեծանա, բայց որևէ արտառոց դեպք չի լինի: Ես դրանում համոզված եմ:
– Ի՞նչ պահանջներ են բարձրացնում մարզում, մասնավորապես, գաղտնիք չէ, որ գործազրկության հետ կապված խնդիրներ կան: Վարչապետի այցի ժամանակ էլ բարձրաձայնվեցին այդ հարցերը: Այդ ուղղությամբ այսօր աշխատանքներ կատարո՞ւմ եք, թե՞ ոչ:
– Իհարկե կատարվում են, գյուղացիները պատրաստվում են գարնանացանին, բնականաբար, քաղաքային համայնքներում էլ մտածում են նոր աշխատատեղերի մասին:
– Պարոն Նալբանդյան, Դուք ՀՀԿ համամասնական ցուցակում 67-րդ տեղում եք: Արդյոք պատգամավոր դառնալու դեպքում կթողնե՞ք մարզպետի պաշտոնը:
– Ես վստահ եմ, որ կուսակցությունը որոշում կկայացնի:
– Ձեր փոխարեն կուսակցությո՞ւնը որոշում կկայացնի:
– Եթե համամասնական ցուցակում եմ, իհարկե կուսակցությունը պետք է որոշում կայացնի:
– Պարոն Նալբանդյան, ՀՀԿ համամասնական ցուցակում նշված է 250 հոգու անուն, մինչդեռ համամասնական տեղերը խորհրդարանում 91 են, եթե, իհարկե, ՀՀԿ-ն 100 տոկոս կազմի, այսինքն, ամբողջ հանրապետության ընտրողները միայն ՀՀԿ-ին ձայն տան: Ձեզ չի՞ ահաբեկում ՀՀԿ ցուցակը, ի՞նչ նպատակ է հետապնդել ՀՀԿ-ն՝ այսքան մարդ ներգրավելով, ՀՀԿ հեղինակությունը բարձրացնելու նպատա՞կ կար, թե՞ համակիրների թիվը ցույց տալու:
– Հանրապետական կուսակցությունն իր հեղինակությունը բարձրացնելու կարիք չունի, որովհետև Հանրապետական կուսակցության հեղինակությունը շատ բարձր է, և այս առումով մեր համակիրների քանակն էլ է շատ, բնականաբար ցուցակն էլ պետք է շատ լինի:
– Հանրապետականացում այս օրերին ակտիվորեն տեղի չի՞ ունենում, ակտիվացա՞ծ է ավելի ժողովուրդը, թե՞ նույնն է, ինչ մի քանի ամիս առաջ:
– Նույն վիճակն է, բան չի փոխվել:
