ՀՀ կրթության և գիտության նախարար Արմեն Աշոտյանը լրագրողների հետ հանդիպման ժամանակ նշեց, որ 2011 թ. բարեփոխումներ իրականացվելու են նաև գիտական ոլորտում. «Բարձրագույն որակավորման հանձնաժողովը (ԲՈՀ) անցյալ տարվանից ձեռնամուխ է եղել գիտական աստիճանաշնորհման կարգերի, ընթացակարգերի, մեխանիզմների կտրուկ վերանայմանը, մասնավորապես՝ խոշորացվելու են Հայաստանում գործող պաշտպանական խորհուրդները: Ավելացել է նաև գիտության բյուջեն: Մենք անցյալ տարեվերջին խոստացել էինք, որ Youtube կայքում կբացվի «կրթական ալիք», այն արդեն բացված է։ Նյութերը դեռ շատ չեն, բայց մենք պարբերաբար հարստացնելու ենք մեր «կրթական ալիքի» կրթական բովանդակությունը` այն մատչելի դարձնելով ոչ միայն մեր քաղաքացիների համար, այլ նաև հարստացնելով կոնտենտը (բովանդակությունը,- խմբ.) սփյուռքահայ աշակերտների և ուսուցիչների համար»:
Աշոտյանը խոստացավ, որ այս տարի ուշադրության կենտրոնում է լինելու հակակոռուպցիոն ռազմավարության իրականացման գործընթացը. «Ծրագրով նախատեսված են բավականին լուրջ փոփոխություններ և աշխատանք: Այս տարի նախատեսվում է նաև վերացնել ընդունելության քննությունները քոլեջներում և ուսումնարաններում՝ մշակելով ընդունելության նոր մեխանիզմներ` դպրոցական գնահատականների հիման վրա, երկրորդը` սկսվելու են աշխատանքներ բարձրագույն ուսումնական հաստատությունների ընդունելության քննություների բարեփոխման ուղղությամբ, որպեսզի 2012 թ. մենք կարողանանք ներկայացնել հասարակությանը ընդունելության քննությունների նոր` ոչ վիճահարույց, կանխատեսելի, սկանդալներից հեռու մեխանիզմներ: Նախատեսվում է նաև մատչելի դարձնել ուսանողների` բուհից բուհ տեղափոխման կարգերը: 2011 թ. մասնավոր բուհերն ընդունելություն կիրականացնեն միմիայն կենտրոնացված քննություների միջոցով: Շուրջ 30 մասնավոր բուհեր կստուգվեն, և մասնավոր բուհերի թիվը 2011 թ. օբյեկտիվ պատճառներով կկրճատվի ևս 7-10-ով»:
Արմեն Աշոտյանը չմեկնաբանեց, չքննարկեց օտարալեզու դպրոցների գործընթացը. «Ես չեմ ցանկանում մեկնաբանել այն ամբողջ գործընթացը, որով ուղեկցվեց միջազգային կրթական ծրագրերի իրականացումը Հայաստանում թույլ տալու մեր ցանկությունը: Տարեվերջյան ասուլիսի ժամանակ ես բարձրաձայնել եմ, որ ներում եմ շատ ու շատ մարդկան ց և շատ ու շատ արտահայտություններ»:
