Վաղը Եվրոպայի խորհրդի մարդու իրավունքների հարցերով գլխավոր հանձնակատար Թոմաս Համարբերգը ժամանելու է Հայաստան: Համարբերգի հետ հանդիպելու է նաև արդարադատության նորանշանակ նախարար Հրայր Թովմասյանը: Նախարարի խոսքերով, հենց Համարբերգն էլ կամփոփի, թե որ պարտավորություններն են կատարվել Հայաստանի կողմից և որոնք` ոչ:
«Ես կգնահատեմ այլ տեսանկյունից` որոնք կարող էինք կատարել, բայց թերացել ենք կատարել: Կներեք համեմատության համար` ամուսնությունից երեք ամիս հետո երեխա մի սպասեք, եկեք հետևենք, թե հղիությունը ինչպես է ընթանում: Այսինքն` եկեք նախ տեսնենք, թե այն ուղղությունը, որը մենք վերցրել ենք, բավարա՞ր է այդ խնդիրների լուծման համար: Ոչ ոք չի ասելու, թե այդ խնդիրները չկան, ես ինքս այդ խնդիրները տեսնում եմ, բայց հարց է՝ կա՞ն մարդիկ, կա՞ քաղաքական իշխանություն, որը պատրաստ է, ունակ է և ցանկություն ունի այդ խնդիրները լուծելու: Ես ձեզ վստահեցնում եմ, որ կա այդ կամքը, և այդ ուժը։ Առաջիկայում դուք ինքներդ կտեսնենք»:
Իսկ առկա խնդիրները և դրանց իրականացման մակարդակը գնահատելու առաքելությունը Հրայր Թովմասյանը թողեց Թոմաս Համարբերգին:
