BRICS անդամ երկրները (Բրազիլիա, Ռուսաստան, Հնդկաստան, Չինաստան, Հարավաֆրիկյան Հանրապետություն) Հնդկաստանում կայանալիք գագաթնաժողովին կքննարկեն միջազգային կարևորության խնդիրներ, մասնավորապես՝ կհամաձայնեցնեն դիրքորոշումները Իրանի միջուկային խնդրի և Սիրիայի շուրջ: Այս մասին հաղորդում է RIA Novosti-ն՝ վկայակոչելով ՌԴ նախագահի օգնական Արկադի Դվորկովիչին:
BRICS գագաթնաժողովը տեղի կունենա մարտի 28-29-ը Նյու Դելիում:
Դվորկովիչը նշել է, որ Սիրիայի հարցում Ռուսաստանի դիրքորոշումը հայտնի է. «Սիրիայի հարցով վերջին հայտարարությունն արտահայտում է մեր դիրքորոշումը»,- ասել է նա:
Հիշեցնենք. մարտի 21-ին ՄԱԿ-ի ԱԽ-ն ընդունենց հայտարարություն, որն իր լիակատար աջակցությունն էր հայտնում ՄԱԿ-ի և Արաբական պետությունների լիգայի հատուկ ներկայացուցիչ Քոֆի Անանի առաքելությանը: Հայտարարության ընդունմանը կողմ քվեարկեց նաև Ռուսաստանը:
