ИТАР-ТАСС-ի փոխանցմամբ՝ Ավստրիան մտադիր չէ խոչընդոտել ԵՄ-ին Թուրքիայի անդամակցությանը: Այս մասին հայտարարել է Ավստրիայի արտգործնախարար Միխայել Շպինդելեգերը՝ իր թուրք գործընկեր Ահմեդ Դավութօղլուի հետ բանակցություններից հետո.
Շպինդելեգերի խոսքերով՝ ավստրիական կողմը երբեք խոչընդոտներ չի հարուցել Անկարայի և Բրյուսելի միջև բանակցություններում: Չնայած դրան՝ Ավստրիայի ժողովրդական կուսակցությունը, որը գլխավորում է հենց Շպինդելեգերը, հանդես է գալիս Թուրքիային «արտոնյալ գործընկերություն» տրամադրելու և ոչ թե ԵՄ-ին լիիրավ անդամակցության օգտին:
Շպինդելեգերը հավելել է, որ ամեն դեպքում իրենք օրակարգից չեն հանում լիիրավ անդամակցելու հարցը:
Հիշեցնենք, որ Անգելա Մերկելը, Ֆրանսիայի նախագահ Նիկոլա Սարկոզիի հետ մեկտեղ, ԵՄ-ին լիիրավ անդամակցության փոխարեն, Թուրքիային առաջարկում է «արտոնյալ գործընկերություն», որի հեղինակը Մերկելն է: Սակայն Թուրքիան դա վիրավորական է համարում` նշելով, որ ինքն արդեն իսկ արտոնյալ հարաբերությունների մեջ է ԵՄ-ի հետ, և լիիրավ անդամակցությունից բացի, չի կարող որևէ այլ բանի մասին խոսք գնալ:
Ի դեպ, 1999 թվականի դեկտեմբերի 10-ին ԵԽ-ի` Հելսինկիում տեղի ունեցած գագաթնաժողովում Թուրքիային շնորհվեց ԵՄ-ին անդամակցելու թեկնածու երկրի կարգավիճակ:
2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին: Այդ օրը ԵՄ անդամ երկրները, Լյուքսեմբուրգում երկարատև քննարկումներից հետո, ընդունեցին Թուրքիայի հետ բանակցություններ սկսելու որոշում:
