Ֆրանսիայի ժանդարմերիայի էլիտար ստորաբաժանումների հիմնադիր 67-ամյա Քրիստիան Պրոտոն սուր քննադատության է ենթարկել «Թուլուզի հրաձիգի» դեմ իրականացված գործողությունը, որն ավարտվել է հանցագործի սպանությամբ:
Ինչպես հաղորդում է RIA Novosti-ն, Պրոտոյի կարծիքով՝ Raid ստորաբաժանման հրամանատարությունը Թուլուզում գործողություններ է իրականացրել առանց հստակ մշակված ծրագրի: Նրա համար անհասկանալի է, թե ինչպես հատուկջոկատայինները չեն կարողացել ողջ բռնել հանցագործին, ինչպես ավելի վաղ խոստացել էին երկրի բարձրագույն իշխանությունները:
Վետերանն առաջարկել է գործողությունների իր ծրագիրը. «Անհրաժեշտ էր արցունքաբեր գազ ներմղել: Դա անգամ 5 րոպե չէր խլի: Բացի այդ, նրանք ներս են նետել լուսաձայնային նռնակներ: Այդ գործողություններն ավելի են զայրացրել Մերային և հանգեցրել են նրա կատաղի դիմադրությանը»,- պատմել է Պրոտոն՝ ավելացնելով, որ իր հրամանատարության ներքո հատուկջոկատայիններն անցկացրել են 64 գործողություն և ոչ ոք չի զոհվել:
