2011 թ. փետրվարի 6-ին ԼՂՀ պաշտպանության բանակի Արայի լեռ զորամասում սպանված 19-ամյա Գևորգ Կոծինյանի մահվան գործով բողոքի քննությունը ՀՀ վերաքննիչ քրեական դատարանում կշարունակվի մարտի 29-ին:
Չորս համածառայակիցների կողմից ծեծվելու հետևանքով մահացած զինծայայող Գևորգ Կոծինյանի իրավահաջորդի ներկայացուցիչներ, փաստաբան Էդմոն Մարուքյանը և փաստաբան Կարեն Թումանյանը վերաքննիչ բողոքով պահանջել են դատարանից ճանաչել Գևորգ Կոծինյանի կյանքի իրավունքի խախտման փաստը, քանի որ գտնում են, որ կատարված սպանության համար պատասխանատու է նաև պետությունը:
Հիշեցնենք, որ 19-ամյա զինծառայողի մահվան պատճառը, ըստ դատաբժշկական փորձաքննության արդյունքների, սրտի ռեֆլեկտոր կանգն է, սակայն քննությունը պարզել է, որ Կոծինյանին ծեծի են ենթարկել 4 համածառայակիցները, ովքեր եղել են ալկոհոլի ազդեցության տակ:
Այս գործով կրտսեր սերժանտ Մարգար Դավթյանը դատապարտվել է 11 տարի 6 ամիս ազատազրկման, շարքայիններ Տարոն Սուվարյանը և Վահե Աղաջանյանը՝ 11 տարի ազատազրկման, ավագ լեյտենանտ Արմեն Ռաֆայելյանը՝ 3 տարվա ազատազրկման։ Արմեն Ռաֆայելյանի նկատմամբ կիրառվել է համաներում և նա ազատվել է պատժի կիրառումից:
«Մենք կարծում ենք, որ եթե պետության ներքո գործող կազմակերպության` ի դեմս պաշտպանության նախարարության, ենթակայության տակ գտնվող մարդ է մահացել, անկախ նրանից, թե հանցագործներն ովքեր են, պետությունն ինքը պատասխանատու է: Հետևապես դատարանում մենք բարձրացրել ենք հետևյալ երկու հարցերը. եթե վերաքննիչը գտնի, որ կոնկրետ հանցավոր ճանաչված անձինք են հանցագործություն են կատարել` իրենցից նյութական փոխհատուցում` 2 մլն դրամի չափով, իսկ պետությունից բարոյական վնասի փոխատուցում` 5 միլիոն դրամի չափով: Մենք գիտենք, որ մեր օրենսդրությունը բարոյական վնասի փոխհատուցում չի սահմանում, բայց այս հարցը մեզ համար ստրատգիական է»,- «Առաջին լրտավականի» հետ զրույցում նշեց Գևորգ Կոծինյանի իրավահաջորդի ներկայացուցիչ Կարեն Թումանյանը: