«Եթե իշխանությունն էականորեն աղավաղի հասարակության կամքը, այլ բան չի մնա, քան փողոց դուրս գալը»,- այսօր լրագրողների հետ հանդիպմանը հայտարարեց ԱԺ ՀՅԴ խմբակցության անդամ Արծվիկ Մինասյանը՝ խոսելով «Ներքաղաքական իրավիճակը Հայաստանում, հնարավոր զարգացումները» թեմայի շրջանակներում:
Ըստ բանախոսի՝ ցանկալի կլիներ, եթե քաղաքական ուժերը հրապարակեին այն մասին, որ իրենք ձեռնպահ կմնան անձի արժանապատվությունը վիրավորող արտահայտություններից: Ա. Մինասյանը նախընտրական գործընթացներում կցանկանար նմանատիպ PR-ի ականատեսը չլինել:
Անդրադառնալով ՀՅԴ համամասնական ցուցակին՝ նա ասաց, որ առաջնորդվել են բոլոր ոլորտներում անհրաժեշտ մասնագետ ունենալու սկզբունքով:
Բանախոսի խոսքով՝ սա նշանակում է, որ շատ լուրջ են տրամադրված և ակնկալում են այնպիսի արդյունք, որը թույլ կտա իրնեց պահանջները, ծրագրային դրույթները դարձնել իշխանության հիմնական օրակարգ։
Նա նաև նշեց, որ ձգտելու են առնվազն այնպիսի ներկայացվածության, որ առանց իրենց որևէ որոշում հնարավոր չլինի կայացնել, այսինքն՝ եթե ՀՅԴ-ն լինի ընդդիմադիր դաշտում, ապա պետք է ունենա այնքան ազդեցություն, որ իշխանությունները չկարողանան շրջանցել իրենց կարծիքը։ «Իսկ իշխանություն լինելու դեպքում կկարողանանք իրականացնել ծրագրերը՝ հաշվի առնելով հանրության և այն քաղաքական ուժերի տեսակետները, որոնք մասնակցում են այս գործընթացին»:
«Մի կարևոր դրույթ ներկայացնեմ, որպեսզի հասկանալի լինի։ Մենք հայտարարում ենք՝ եթե ՀՅԴ-ն իշխանություն լինի, իրեն վերահսկելու հնարավորությունը վերապահելու է իր ընդդիմախոսներին: Սա թիվ մեկ սկզբունքն է, որ մենք հայտարարում ենք»,- պարզաբանեց բանախոսը։
Անդրադառնալով հետընտրական զարգացումներին՝ Ա. Մինասյանն ասաց, որ Հայաստանում կարող է կրկնվել Ռուսաստանի ընտրությունների պատկերը, սակայն չէր ցանկանա, որ այդ ընտրությունների արդյունքում ժողովուրդը ստիպված լիներ դուրս գալ փողոցային պայքարի։
