Հասարակության շրջանում բարձր վարկանիշ են ունեցել նաև Գագիկ Ծառուկյանն ու Րաֆֆի Հովհաննիսյանը: Այսօր «Առաջին լրատվական»-ի հետ զրույցում ասաց Հայկական սոցիոլոգիական ասոցիացիայի ղեկավար Գևորգ Պողոսյանը` խոսելով քաղաքական դեմքերի վարկանիշներից:
Նրա տեղեկացմամբ` գրեթե բոլոր հարցումները վկայել են, որ ըստ անհատական վարկանիշի` ՀՀ նախագահներից առաջին տեղում Սերժ Սարգսյանն է, հետո` Ռ. Քոչարյանը, այնուհետև` Լևոն Տեր-Պետրոսյանը:
«Իսկ Գագիկ Ծառուկյանն ու Րաֆֆի Հովհաննիսյանը բավական բարձր վարկաիշ են ունեցել` համարյա առաջին դեմքերին հավասար: Չլինելով նախագահ` նրանք միշտ բարձր վարկանիշ են ունեցել հասարակության շրջանում»,- մանրամասնեց սոցիոլոգը:
Անդրադառնալով հասարակության` կուսակցությունների նկատմամբ վերաբերմունքին` Գևորգ Պողոսյանն ասաց, որ առաջատարը ՀՀԿ-ն է, որին հաջորդում է ԲՀԿ-ն: Ըստ նրա` երրորդ տեղում կարելի է նշել ՀԱԿ-ին:
«Առայժմ ոչինչ չի փոխվել, որովհետև համոզված եմ, որ հանրությունը դեռ չի գնահատել կուսակցությունների թիմերի փոփոխությունները»,- գնահատելով իրավիճակը` կարծիք հայտնեց Հայկական սոցիոլոգիական ասոցիացիայի ղեկավար Գևորգ Պողոսյանը:
