Սիրիայի հարցում Ռուսաստանի դիրքորոշման մեջ զգալի տեղաշարժ է նկատվում: Դա է վկայում Մոսկվայի կողմից ՄԱԿ-ի Անվտանգության խորհրդի հայտարարությանը կողմ քվեարկելու փաստը: Այս մասին գրում է The Christian Science Monitor-ը:
Պարբերականը հիշեցնում է, որ Սիրիայի հարցում մի քանի ամիս տևած անգործությունից հետո, որը պայմանավորված էր Ռուսաստանի և Չինաստանի դիմադրությամբ, ՄԱԿ-ի Անվտանգության խորհուրդը հայտարարություն ընդունեց՝ իր աջակցությունը հայտնելով ՄԱԿ-ի և ԱՊԼ ներկայացուցիչ Քոֆի Անանի առաքելությանը և զգուշացնելով «հետագա քայլերն» ուսումնասիրելու հնարավորության մասին: Փաստաթուղթը նաև կոչ է անում դադարեցնել կրակը, քաղաքական երկխոսություն սկսել և թույլ տալ մարդասիրական կազմակերպություններին մուտք գործել երկիր:
Reuters-ն իր հերթին գրում է, որ կողմ քվեարկելով փաստաթղթին՝ Մոսկվան «դիվանագիտական հարված» հասցրեց իր դաշնակից Բաշար Ալ-Ասադին:
Ավելի վաղ Коммерсантъ FM ռադիոկայանին տված հարցազրույցում Ռուսաստանի արտգործնախարար Սերգեյ Լավրովը խոստովանել էր, որ Ասադը շատ սխալներ է գործել: Սիրիայի ղեկավարությունը սխալ է արձագանքել խաղաղ ցույցերի առաջին դրսևորումներին: Նա նշել է, որ չնայած իրենց կողմից բազմաթիվ զգուշացումներին՝ Սիրիայի ղեկավարությունը շարունակում է սխալներ թույլ տալ, ինչի հետևանքով հակամարտությունը իր գագաթնակետին է հասել:
RTT-ն, որը մեջբերումներ է արել Լավրովի հարցազրույցից, նրա արտահայտությունները մեկնաբանել է որպես «հստակ տեղաշարժ» Սիրիայի հարցում:
