Ավստրալիայի Նոր Հարավային Ուելս նահանգի ոստիկանությունն այսօր ձերբակալել է Ավստրալիայի ամենափնտրվող հանցագործին,- հաղորդում է Associated Press-ը:
Մալքոլմ Նեյդենը 7 տարի շարունակ թաքնվել է արդարադատությունից: Մարտի 22-ին նա ձերբակալվել է Սիդնեյից 260 կմ հեռավորության վրա գտնվող Գլոսթեր քաղաքի մոտ: Նրա տանը ոստիկանությունը զենք է հայտնաբերել, սակայն ձերբակալության գործողության ժամանակ կրակոցներ չեն հնչել: Հաղորդվում է միայն, որ ոստիկանական շունը կծել է հանցագործին, և ձերբակալությունից անմիջապես հետո նա տեղափոխվել է հիվանդանոց:
Ոստիկանությունը կարծում է, որ Նեյդենը անհրաժեշտ փորձ է ունեցել վայրի բնության մեջ ապրելու համար և ժամանակի մեծ մասն անցկացրել է Նոր Հարավային Ուելս նահանգի անտառներում: Ձերբակալության պահին նա եղել է թավ մորուքով և անխնամ հագուստով:
Նեյդենը ժամանակին ապրել է Դաբո քաղաքում՝ իր տատի և պապի հետ: Տղամարդն անհետացել է 2005 թ., երբ նրա սենյակում հայտնաբերվել է նրա զարմուհու՝ Քրիստի Շոլսի անշունչ մարմինը: Նեյդենի դեմ հետախուզում է հայտարարվել:
2011 թ. հաջողվեց պարզել Նեյդենի գտնվելու վայրը, սակայն ձերբակալելու գործողության ժամանան նա փախուստի դիմեց՝ վիրավորելով ոստիկաներից մեկին: Դրանից հետո հանցագործի որոնողական աշխատանքներում ներգրավված էր շուրջ 50 ոստիկան:
Ձերբակալությունից հետո Նեյդենին մեղադրանք է ներկայացվել իր զարմուհու սպանության, 15-ամյա աղջկա նկատմամբ անառակ գործողությունների և ոստիկանի սպանության փորձի համար: Նեյդենը կասկածվում է նաև իր երկրորդ զարմիկի՝ Լատիշա Նոլանի անհետացման մեջ:
Նեյդենի գործով առաջին դատական լսումները տեղի կունենան ապրիլի 24-ին:
