ԱՄՆ Սենատի Ցեղասպանության ճանաչման նոր օրինագիծը պետք է տեղավորել նախընտրական քարոզչության շրջանակներում, «Առաջին լրատվական»-ի հետ զրույցում նման տեսակետ հայտնեց թուրքագետ Ռուբեն Մելքոնյանը`անդրադառնալով ԱՄՆ Սենատում ներկայացվելիք նոր բանաձևին:
Թուրքագետը նշեց, որ Հայոց ցեղասպանության հարցը դարձել է ԱՄՆ և՛ արտաքին քաղաքականության, և՛ ներքին քաղաքականության զինանոցի տարրերից մեկը, որն ԱՄՆ-ը կիրառում է ըստ նպատակահարմարության: Ըստ նրա`արտաքին քաղաքականության մեջ Ցեղասպանության ճանաչման խաղաքարտը դրվում է շրջանառության մեջ, երբ անհրաժեշտ է լինում Թուրքիայի վրա ճնշումներ գործադրել: Իսկ ներքին քաղաքականության մեջ, ըստ Ռ. Մելքոնյանի, սա հատկապես զգացվում է նախընտրական շրջանում, երբ փորձ է արվում հայ համայնքի ձայները գրավելու ուղղությամբ աշխատանքներ տանել: «Ամեն ապրիլի 24-ին նախորդող ժամանակաշրջանում սկսվում են նմանատիպ գործընթացներ, բայց իմ կարծիքով՝ ԱՄՆ ներկայիս գործընթացը որևէ լուրջ, շոշափելի արդյունքի չի բերելու և տեղավորվելու է ԱՄՆ ներքաղաքական զարգացումների համատեքստում, քանի որ մոտենում են նախագահական ընտրությունները: Չմոռանանք նաև, որ ԱՄՆ պետքարտուղար Հիլարի Քլինթոնը վերջին ժամանակներս բավական հստակ և բավական կոշտ հայտարարել էր, որ իրենք դեմ են Հայոց ցեղասպանության փաստի ճանաչմանը և ճանաչումը քրեականացնող օրենքներին և՛ իրենց երկրում, և՛ տարբեր երկրներում»,- հիշեցրեց Ռ. Մելքոնյանը` այս ամենը հաշվի առնելով, ասելով, որ ԱՄՆ-ում մեկնարկած գործընթացը պետք է բացառապես տեղավորել նախընտրական քարոզչական նպատակների համատեքստում:
Ըստ թուրքագետ Ռ. Մելքոնյանի` այստեղ նաև ազդեցություն չեն ունենա հայկական լոբբիի գործողությունները, քանի որ առավելապես ազդեցություն կունենան վերը թվարկած ազդակները:
Հիշեցնենք, որ հայամետ սենատորներ` Նյու Ջերսին ներկայացնող դեմոկրատ Ռոբերտ Մենենդեսի և Իլինոյսը ներկայացնող հանրապետական, ԱՄՆ Կոնգրեսի հայկական հարցերով հանձնախմբի նախկին համանախագահ Մարկ Քըրքի նախաձեռնությունն է այս ամիս Հայոց ցեղասպանությունը ճանաչող նոր բանաձևի նախագիծ ներկայացնել ամերիկյան Սենատ:
