«Մեզ խանգարում է 2000 թվականից ՀՀ-ում քաղաքական վատ ավանդույթ դարձած մի երևույթ, երբ կան կուսակցություններ, որոնք կառավարության, կոալիցիայի անդամ են ֆորմալ, և մինչև 2003թ.՝ ոչ ֆորմալ առումով, բայց իրենց գործելաոճում պարբերաբար փորձում են այս նույն դրսևորումներն ունենալ, ինչը վերջերս ունեցել է ԲՀԿ-ն»,- երեկ «168 ժամ»-ի թղթակցի հետ զրույցում ասել է ՀՀ ԿԳՆ նախարար, ՀՀԿ փոխնախագահ Արմեն Աշոտյանը՝ մեկնաբանելով ԲՀԿ համագումարում այդ կուսակցության ղեկավարների կողմից հնչեցված քննադատությունները:
«ՀՀԿ-ն այդ վիճակում ՕԵԿ է տեսել, ՀՅԴ է տեսել, մեզ համար ծանոթ է այդ գործելաոճը: Ցավում եմ, որ ԲՀԿ-ն բացառություն չեղավ և չկարողացավ զերծ մնալ այդ գայթակղությունից: Իրականում, որպեսզի ավելի ռեալ հասկանանք կառավարման համակարգում և կառավարությունում մեր կոալիցիոն գործընկերների դերակատարությունը, ընդամենը պետք է շեշտենք, որ պետական բյուջեի մոտ 35 տոկոսը տնօրինվում է կամ գտնվում է ԲՀԿ-ի 4 նախարարությունների պատասխանատվության ներքո:
Խնդրում եմ, այդ դեպքում մատնանշենք բոլոր խնդիրները, և իրենք էլ զրույցի բռնվեն հասարակության հետ այնպես, ինչպես անում Է ՀՀԿ-ն»,- ասել Է նա:
Մինչև ԲՀԿ-ին անդամակցելը Վարդան Օսկանյանը հայտարարել Էր, թե ԲՀԿ-ն այդ խնդիրների համար պատասխանատու Է այնքանով, որքանով մաս Է կազմում կառավարությանը: Նման հայտարարություններ հնչել են նաև ԲՀԿ այլ անդամների կողմից: Դրանց ակնարկն այն Է, որ ավելի առանցքային պաշտոնները՝ նախագահ, Աժ նախագահ, վարչապետ, ուժային կառույցներ, հարկային-մաքսային ոլորտներ, ՀՀԿ-ի կամ Ս. Սարգսյանի համակարգման ոլորտում են: Այս դիտարկմանն ի պատասխան՝ Աշոտյանը նշել Է.
«Եթե որևէ մի քաղաքական ուժ փաստում է իշխանության ներսում իր քաղաքական թուլությունը, ապա հաջորդ քայլն էլ հասունացած է լինում՝ այդ դեպքում պետք է լքել քաղաքական պատասխանատվության նավը, նկատի ունեմ կոալիցիան: Եթե չես լքում, ապա ակնհայտ է, որ ստորագրված բոլոր հուշագրերը, սկսած կոալիցիոն մայր հուշագրից՝ այլ հայտարարություններով վերջացրած, չեն ենթադրում հատվածական, ոլորտային պատասխանատվություն: Եվ երրորդը՝ դիցուք, հատվածական պատասխանատուներ են, փայլո՞ւմ է ամեն ինչ այդ ոլորտներում: Այդ ոլորտներում ամեն ինչ արդեն արե՞լ են, փոխե՞լ են և հիմա ուզում են նաև ա՞յլ ոլորտների մեջ փոփոխություններ մտցնել»: