Այսօր Երևանի քաղաքապետ Տարոն Մարգարյանը հանդիպել է Հայաստանի Հանրապետական կուսակցության երիտասարդական կազմակերպության Երևանի խորհրդի անդամների հետ: Քաղաքապետը նշել է, որ Հանրապետական կուսակցությունը մշտապես սատարել է երիտասարդ կուսակիցներին և այդ առումով որդեգրած սկզբունքը չի փոխվելու:
«Երիտասարդները մեր երկրի ապագայի կերտման երաշխավորներն են: Մենք շարունակելու ենք բանիմաց երիտասարդներին ներգրավել մեր երկրի կառավարման պետական համակարգ: Վստահ եղեք, ձեր ակտիվությունը, իրատեսական գաղափարներն ու վճռականությունը անպայման կգնահատվեն: Այդ ճանապարհին ես և ձեր մյուս ավագ գործընկերները պատրաստ ենք հնարավորին աջակցել»,- ասել է Մարգարյանը:
Երիտասարդ հանրապետականները վստահեցրել են քաղաքապետին, որ իրենք ևս պատրաստ են ներգրավվել ու աջակցել քաղաքային իշխանությանը` տարատեսակ ծրագրերի իրականացման հարցերում: Այս համատեքստում քաղաքապետ Տարոն Մարգարյանը անդրադարձել է մասնավորապես բարեկարգման ու կանաչապատման ծրագրերին և նշել, որ արդեն սկսվել է պուրակների համալիր բարեկարգման գործընթացը, որի շրջանակում հատուկ ուշադրություն է դարձվելու կանաչապատմանն ու նոր կանաչ գոտիների ստեղծմանը, ինչպես նաև ոռոգման ցանցերի արդիականացմանը: Անդրադառնալով քաղաքային իշխանությունների կողմից իրականացվող ծրագրերում ներգրավվելու երիտասարդների պատրաստակամությանը, Տարոն Մարգարյանը նշել է, որ քաղաքապետարանը միշտ էլ բաց է շահագրգիռ բոլոր կողմերի հետ առողջ համագործակցության համար:
ՀՀԿ երիտասարդական կազմակերպության նախագահ Կարեն Ավագյանն առաջարկել է քննարկել Մաշտոցի պուրակում երիտասարդ քանդակագործների աշխատանքների տեղադրման հնարավորությունը, ինչն, ըստ նրա, կնպաստի պուրակը հանգստյան գոտի դարձնելուն: Տարոն Մարգարյանը խոստացել է առաջարկը ներկայացնել համապատասխան մասնագետների քննարկմանը:
Հանդիպման վերջում ՀՀԿ երիտասարդական կազմակերպության Երևանի խորհրդի անդամները քաղաքապետին են նվիրել իրենց կողմից լայնաշերտ ապակու վրա փորագրված Երևան քաղաքի հատակագիծը: Շնորհակալություն հայտնելով յուրօրինակ նվերի համար, քաղաքապետ Տարոն Մարգարյանը խոստացել է այն փոխանցել Երևանի պատմության թանգարանին: Պայմանավորվածություն է ձեռք բերվել երիտասարդների հետ հանդիպումները դարձնել պարբերական:
