«Առաջին լրատվական»-ի զրուցակիցն է Հայ ազգային կոնգրեսի անդամ, Քրիստոնեա–ժողովրդական վերածնունդ կուսակցության նախագահ Սոս Գիմիշյանը:
– Պարոն Գիմիշյան, երկուսուկես տարի է, ինչ գործում է Հայ ազգային կոնգրեսը: Ըստ Ձեզ`ՀԱԿ–ը այսօ՞ր էլ է արդարացնում հասարակության սպասելիքներն այնպես, ինչպես` սկզբնավորման օրվանից:
– ՀԱԿ–ն այս ընթացքում անցել է որոշակի ճանապարհ, շարունակում է գործել: Իսկ դա հայաստանյան քաղաքական պայքարի պատմության մեջ լուրջ ձեռքբերում է, եզակի դեպք: Հասարակությունը կարող է գոհ լինել ՀԱԿ–ից միայն այն ժամանակ, երբ նա կարողանա իրականացնել իր առջև դրված խնդիրները`սահմանադրական կարգի հաստատում, լեգիտիմ իշխանության ձևավորում: Հայաստանում շատ մեծ է սուբյեկտիվ խնդիրների տեսակարար կշիռը. թալան, կոռուպցիա, մարտի 1-ի ոճրագործություն, քաղբանտարկյալներ: Եվ այդ բոլոր խնդիրները լուծում են պահանջում:
– Իշխանությունները ՀԱԿ–ի դերակատարումը նվազեցնելու և նրա նկատմամբ անվստահություն սերմանելու նպատակով հրապարակ են նետել հերթական կեղծ ընդդիմությունը` հանձին Տիգրան Կարապետյանի: Խոսակցություններ են նույնիսկ շրջանառվում, որ նա, միանալով Երևանի նախկին քաղաքապետ Գագիկ Բեգլարյանի հետ, պետք է զոհի կարգավիճակով ներկայանա հանրությանը և ձայներ փախցնի իրական ընդդիմությունից: Չե՞ք կարծում, որ սրանով իշխանությանը կհաջողվի թիկունքից խփել Հայ ազգային կոնգրեսին:
– Բացարձակապես: Այդ իմաստով մտահոգություններ չունեմ: Չեմ կարծում, որ Երևանի նախկին քաղաքապետն ու Տիգրան Կարապետյանը կարող են միավորվել և միասին ինչ–որ ճանապարհ անցնել: Համամիտ եմ, որ մեր ժողովուրդը սիրում է զոհի կարգավիճակում հայտնվածներին: Բայց եկեք հիշենք, որ 2008 թ. ՀՀ Նախագահի ընտրություններից առաջ «ԱԼՄ» հեռուստաընկերությունն ամբողջովին լծված էր «ցուրտ ու մութ» տարիների քարոզչությունն անելուն և այդպիսով սպասարկում էր իշխանություններին: Ես, օրինակ, որպես ՀՀ քաղաքացի, հպարտանում եմ, որ անցյալ դարի 90-ականներին հաղթահարել եմ ցուրտն ու մութը` հանուն մեր երկրի ապագայի: Իսկ բոլոր նրանք, որոնք շահարկում են այդ «ցուրտ ու մութ» տարիները քաղաքական նպատակներով, բարոյականությունից զուրկ մարդիկ են: Ժամանակին իրեն այդպես պահեց նաև «ԱԼՄ» հեռուստաընկերությունը:
– Բայց «Ո՛չ անարդարությանը» կարգախոսով Տիգրան Կարապետյանը կարող է իր շուրջը բազմաթիվ մարդկանց համախմբել` քաջ գիտակցելով, որ մեր հասարակությունը հենց արդարության է ծարավի:
– Շատ լավ: Բոլոր այն մարդիկ, որոնք դուրս կգան պայքարելու անարդարությունների դեմ, ես ուրախ կլինեմ: Եթե Տիգրան Կարապետյանը արդարություն հաստատելու համար կարողանա որոշակի զանգվածների ոտքի հանել, ես միայն կողջունեմ: Այն ակտիվ մարդիկ, որոնք կպայքարեն անարդարությունների դեմ, հետագայում կարող են միանալ Հայ ազգային կոնգրեսին: Եթե դա իշխանության հերթական «պրոյեկտն» է, ապա կարծում եմ, որ այն նույնքան անլուրջ է, որքան մյուս «պրոյեկտները»: Հիշենք, թե մեր պայքարն ինչ արդյունքներ տվեց. հիմա ո՞ւր են Արթուր Բաղդասարյանը, Արտաշես Գեղամյանը: Ի՞նչ է անում իշխանությունը ժողովրդի սոցիալական վիճակը բարելավելու համար իր իշխանական պրոյեկտներով: Ինձ համար ամենացավալին այն է, որ մեծ չափերի է հասել արտագաղթը: Եթե չլիներ արտագաղթը, ես տրամադրված կլինեի երկարաժամկետ, քաղաքակիրթ պայքարի: Բայց քանի որ ամեն օրը մեզ համար թանկ է, մենք պետք է ամեն ինչ անենք` օր առաջ վերականգնելու սահմանադրական կարգը և ժողովրդին վերադարձնելու իշխանությունը: Տեսեք, թե որքան ապաշնորհ են այս իշխանությունները: Ամբողջ աշխարհը գիտի, որ Ղարաբաղյան պատերազմը սկսել է Ադրբեջանը: Սակայն այսքանից հետո միջազգային հանրությունն ագրեսոր է ճանաչում Հայաստանին:
– Առանձին անհատներ ժամանակ առ ժամանակ բարձրաձայնում են, որ ՀԱԿ–ում առկա է ներքին ժողովրդավարության պակաս: Ըստ Ձեզ` հաջողվու՞մ է տարբեր կուսակցություններ ներկայացնող գործիչների և անհատների պատկերացումները մեկտեղել մի կառույցում:
– Այո՛, կան այդ խնդիրները: Դրանք պետք է լուծել և անցնել առաջ: Սակայն անարդարությունների դեմ պետք է պայքարել ամեն օր և ոչ թե անձնական նկատառումներից ելնելով: Ես, օրինակ, ամեն անգամ մասնակցում եմ ՀԱԿ–ի քաղխորհրդի նիստերին և բարձրաձայնում ինձ հուզող խնդիրների մասին: Եվ չի եղել որևէ դեպք, որ ինձ զրկեն մտահոգիչ հարցերը բարձրաձայնելու իմ իրավունքից: ՀԱԿ–ի քաղխորհուրդը ներկայացնում են կուսակցությունների ղեկավարները, որոնք ընտրվել են իրենց կուսակցությունների կողմից: Բոլոր որոշումներն ընդունվում են կոնսենսուսով, և եթե մեկ կուսակցություն դեմ է լինում, այդ որոշումը չի ընդունվում: