Ռուսական ВЗГЛЯД թերթի փոխանցմամբ՝ Վրաստանի իշխանամետ պատգամավորները հայտարարել են, որ իրենք մտադիր չեն ընդունել ԱՄՆ դեսպան Ջոն Բասսի «դիրեկտիվները»: Հիշեցնենք, որ Ջոն Բասսը հայտարարել էր, թե Վրաստանի Վերահսկիչ պալատը ճնշումներ է բանեցնում ընդդիմության ներկայացուցիչների վրա:
Այս կապակցությամբ պատգամավոր Ակակի Բոբոխիձեն հայտարարել է, որ Ջոն Բասսը, ինչպես նաև ցանկացած այլ դիվանագետ, չի կարող դիրեկտիվներ տալ Վրաստանի իշխանություններին.
«Մենք անկախ պետություն ենք և ոչ թե ԱՄՆ-ի խամաճիկները: ԱՄՆ-ի դիրքորոշումը կարևոր է, սակայն այն վճռորոշ չէ: Մեզ համար վճռորոշ են վրացական օրենքները»:
Իսկ պատգամավոր Շաթա Մալաշխիան հայտարարել է, որ Վրաստանի իշխանություններն իրենք կորոշեն՝ հաշվի առնե՞լ, թե՞ չառնել ամերիկյան կամ այլ դեսպանի դիտողությունները:
Հիշեցնենք, որ վերջին օրերին Վերահսկիչ պալատը ֆինանսական մեքենայությունների պատճառաբանությամբ պալատ էր կանչել Բիձինա Իվանիշվիլիի 300 համակիրների: Այդ կապակցությամբ Բիձինա Իվանիշվիլին հայտարարել է, որ Վերահսկիչ պալատը դարձել է Վրաստանի նոր դատախազություն:
