РИА Новости-ին տված հարցազրույցի ժամանակ ԵԱՀԿ Մինսկի խմբի ռուս համանախագահ Իգոր Պոպովն անդրադարձել է Ղարաբաղյան հակամարտության կարգավորմանը. «Ղարաբաղյան բանակցային գործընթացն ընթանում է բավական ինտենսիվ: Քննարկվում են «հիմնարար սկզբունքները», որոնք խաղաղության ապագա պայմանագրի համար պետք է ծառայեն որպես բազա:
Վերջին մեկ տարվա ընթացքում տեղի ունեցավ երեք հանդիպում, որոնցում Հայաստանի ու Ադրբեջանի նախագահները կարողացան հստակեցնել իրենց դիրքորոշումները մի շարք վիճելի հարցերի շուրջ: Դրանք շատ չեն՝ համեմատած համաձայնեցված հարցերի հետ, սակայն դրանք առավել բարդ են:
Հունվարին Սոչիում տեղի ունեցած եռակողմ հանդիպման ժամանակ նախագահներ Սերժ Սարգսյանն ու Իլհամ Ալիևը հայտարարեցին «հիմնարար սկզբունքների» շուրջ պայմանավորվածություն ձեռք բերելն արագացնելու իրենց մտադրության մասին:
Դա վկայում է, որ կողմերը ոչ միայն պատրաստ են շարունակել խաղաղության գործընթացը, այլև՝ մտադիր են ջանքեր գործադրել, որ այդ գործընթացը տա ցանկալի արդյունք: ԵԱՀԿ Մինսկի խմբի համանախագահներ Ռուսաստանը, ԱՄՆ-ը և Ֆրանսիան հանդես են գալիս հակամարտության միայն խաղաղ կարգավորման օգտին: Այդ մասին է վկայում դովիլյան հայտարարությունը:
Միջնորդների դերը մեծ է: Դա վերաբերում է թե՛ օգնություն ցուցաբերելու պատրաստակամությանը, թե՛ խնդրի լուծման առաջարկներ ներկայացնելուն: Սակայն ես ցանկանում են ընդգծել, որ պայմանավորվածության հանգելը կախված կլինի միայն հակամարտող կողմերի բարի կամքի ցուցաբերումից»:
