Ինչպես հաղորդում է PC Mag կայքը, Գեյթսերի ընտանիքում Apple ընկերության բոլոր սարքերն արգելված են: Այս մասին The New-York Times թերթին տված հարցազրույցում ասել է Բիլ Գեյթսի կինը` Մելինդան: Թերթի այն հարցին, թե ինքն ունի՞ արդյոք Apple iPod, Մելինդան պատասխանել է` «Ոչ, ես ունեմ Zune (նույնպիսի սարք, որն առաջարկում է Microsoft ընկերությունը)»: Նրա խոսքերով, եթե երեխաները պահանջեն Apple-ի նվագարկիչ, ապա ինքը նրանց կառաջարկի Microsoft-ի նմանատիպ սարքը:
Սակայն կայքի փոխանցմամբ, որքան էլ որ ջանա Գեյթսի կինը, թվերն այլ բան են ասում: Շուկայի մոտ 76%-ը պատկանում է iPod-ին, մինչդեռ Zune-ը զբաղեցնում է շուկայի ընդամենը 1%-ը: Ժամանակին Microsoft-ի այդ սարքը ներկայացվում էր որպես «iPod-ի մահ», սակայն առաջինը պարտվեց այս «ճակատամարտում»:
Microsoft-ին միշտ մտահոգում է հակառակորդի գործունեությունը: Օրինակ, այդ ընկերությունը վերջերս Facebook սոցիալական կայքում ներկայացրեց “PC or Mac?” ծրագիրը, որով մրցանակներ է տալիս Windows-ի հավատարիմ հետեւորդներին, հընթացս իրակացվում են նաեւ Apple-ի հակա-PR ակցիաներ: