Ջավախահայերի հիմնախնդիրները ժամանակի ընթացքում լուծվում են: Այսօր «Առաջին լրատվական»-ի հետ զրույցում ասաց Վրաստանի նախագահի խորհրդական Վան Բայբուրդը:
Ավելի վաղ «Առաջին լրատվական»-ի հետ զրույցում «Բազմազգ Վրաստան» կազմակերպության ղեկավար Առնոլդ Ստեփանյանն ասել էր, որ ջավախահայերը հազվադեպ են իրենց խնդիրները բարձրաձայնում: Նա նաև նշել էր, որ Վրաստանում կան խոսքի ազատության և մարդու իրավունքների սահմանափակումներ: Արձագանքելով այս հրապարակմանը` Վան Բայբուրդն ասաց, որ ջավախահայերն ունեն հեռուստաընկերություններ, թերթեր և կարողանում են ազատ արտահայտվել առանց որևէ սահմանափակման: Նա հարկ համարեց նշել, որ հայաշատ համայնքներում ղեկավարները հենց հայեր են և Վրաստանի խորհրդարանի հայ պատգամավորները մշտապես Վրաստանի իշխանություններին հասցնում են ջավախահայերի օրակարգային խնդիրների մասին, որոնց հետագայում ընթացք է տրվում:
«Վերջին տարիների ընթացքում մի շարք կարևոր ճանապարհներ են վերանորոգվել և շարունակում են, ես չեմ հերքում, որ կան խնդիրներ, բայց դրանք այնքան չեն, որքան ներկայացվում են»,- նշեց Վան Բայբուրդը:
