«Freedom House»-ի տարեկան զեկույցում ԼՂՀ-ն դասվել է «ոչ ազատ» երկրների շարքին: Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանի գնահատմամբ, այդ զեկույցում նման եզրակացության հանգելը որոշակի քաղաքականություն է. «Սակայն այն մեկնաբանությունները, որոնք բերվել են զեկույցում, կարծում եմ, ինչ-որ տեղ համապատասխանում են իրականությանը: Այն հանգամանքը, որ ԼՂ պառլամենտում ընդդիմություն չկա ևս հիմք է: Ես չեմ տեսել, որ որևէ մեկը հերքի, թե դա այդպես չէ»:
Մանվել Սարգսյանը նշեց, թե լավ է, որ նմանատիպ հետազոտություններում Ղարաբաղին ուշադրություն են դարձնում. «Դա արդեն իսկ հետաքրքիր է, բայց Ղարաբաղի իշխանությունները պիտի շատ լավ հասկանան, որ այնպես չէ, որ իրենք սար ու ձորում են, և ոչ ոք չի նկատում, թե իրենք ինչով են զբաղված, և պետք է դրանից լուրջ հետևություններ անեն»:
Հարցին, թե արդյոք կազդի՞ «Freedom House»-ի զեկույցը ԼՂ հարցի կարգավորման վրա, Սարգսյանը պատասխանեց. «Կազդի, իհարկե, ԼՂ-ն անընդհատ հարց է բարձրացնում, թե ինքը պիտի մասնակցի բանակցային գործընթացներին և որպես արգումենտ է բերում Ադրբեջանի համեմատ իր ավելի ժողովրդավար լինելը: Բա ո՞ւր է հիմա այդ արգումենտը, հիմա կարո՞ղ են ԼՂ իշխանությունները նորից այդ արգումենտը առաջ քաշել»:
