Ֆուկուսիմա պրեֆեկտուրայի այն բնակիչները, որոնք հնարավորություն չեն ունենա հաջորդ 5 տարում վերադառնալ իրենց բնակավայրերը՝ ռադիոակտիվ հողի վարակազերծման աշխատանքների պատճառով, 6 մլն իենի (շուրջ 70 հազար ամերիկյան դոլար ընթացիկ կուրսով) փոխհատուցում կստանան: Այս մասին նշված է կառավարական հանձնաժողովի հաշվետվության մեջ, որը զբաղվում է գումարային փոխհատուցման խնդիրներով:
Գումարը նախատեսված է գոնե մասնակի փոխհատուցելու այն «բարոյական վնասը», որը կառավարության կարծիքով, կրում են այն մարդիկ, որոնք հնարավորություն չունեն վերադառնալ իրենց տները ու ստիպված են ապրել երկրի այլ շրջաններում: Բացի այդ ՝ Ճապոնիայի կառավարությունը ամբողջությամբ կվճարի այն մարդկանց տների գումարը, ովքեր չեն ցանկանա այլևս վերադառնալ Ֆուկուսիմայի շրջան:
Ճապոնիայի կառավարությունը ներկայում սպասում է գարնան վերջնական գալուստին ու լավ եղանակի, որպեսզի վերսկսվի հողը ռադիոակտիվ տարրերից վարակազերծելու լայնածավալ գործընթացը:
Նախատեսված է ընդհանուր առմամբ վարակազերծել 29 մլն քմ տարածք Ֆուկուսիմայի ու դրա հարակից շրջանում:
Հիշեցնենք, որ անցյալ տարվա մարտի 11-ին Ճապոնիայում տեղի ունեցավ 9 մագնիտուդ ուժգնությամբ հզոր երկրաշարժ: Դրան հաջորդեց կործանիչ ցունամի, որի ժամանակ ալիքների բարձրությունը հասավ 10 մետրի: Աղետի հետևանքով, պաշտոնական տվյալներով, զոհվել է 16 հազար մարդ, շուրջ 3000-ը համարվում են անհետ կորած, ավերվել է մոտ 330 հազար տուն: Առավելապես տուժել են Իվատե, Միյագի և Ֆուկուսիմա պրեֆեկտուրաները:
