Ուկրաինայի գլխավոր դատախազությունը պարտադրել է Ուկրաինայի նախկին վարչապետ, ընդդիմադիր «Բատկիվշինա» կուսակցության առաջնորդ Յուլիա Տիմոշենկոյին, որին մեղադրում են միջոցների ոչ ճիշտ ծախսման մեջ, ամեն օր ներկայանալ քննիչներին: Այդ մասին, ինչպես տեղեկացնում է УНИАН-ը, պատմել է անձամբ Տիմոշենկոն դատախազություն հերթական այցից հետո:
Նրա խոսքերով, իրեն պարտադրված էր ամեն օր (ժամը 10:00-17:00) ներկայանալ հատուկ գործերի քննչական գլխավոր վարչություն և ծանոթանալ իր քրեական գործի նյութերին:
Ավելի վաղ դատախազությունը մեղադրում էր Տիմոշենկոյին գործի քննությունը ձգձգելու մեջ: Նախկին վարչապետն, իր հերթին, այս մեղադրանքները ժխտում է:
Դատախազության նախկին որոշումը նա համարում է «ծաղրանք»՝ ենթադրելով, որ նմանատիպ հրահանգերը գալիս են նախագահ Վիկտոր Յանուկովիչից: Հիշեցնենք, որ 2010 թ. Յանուկովիչի և իր Տարածաշրջանների կուսակցության՝ Ուկրաինայում իշխանության գալու հետ մեկտեղ քրեական գործեր հարուցվեցին նախկին կառավարության, որը գլխավորում էր Տիմոշենկոն, ներկայացուցիչների դեմ: Նախկին աշխատակիցներից ոմանք, մասնավորապես ՆԳՆ նախկին նախարար և «Ազգային ինքնապաշտպանություն» կուսակցության առաջնորդ Յուրի Լուցենկոն ձերբակալվեցին:
Իսկ Տիմոշենկոյի նկատմամբ հարուցվեց քրեական գործ «Պաշտոնական դիրքի չարաշահում, որը հանգեցրել է ծանր հետևանքների» հոդվածով: Նրան մեղադրել են միջոցների աննպատակ օգտագործման մեջ: Դեկտեմբերի վերջին նախկին վարչապետին մեղադրանք է ներկայացվել:
Տիմոշենկոն արդեն բազմիցս գնացել է դատախազություն, որոնցից ամենաերկար այցը եղել է դեկտեմբերի 31-ին (11 ժամ տևողությամբ):
Տիմոշենկոն և իր համախոհները իշխանությունների գործողությունները համարում են քաղաքական հաշվեհարդար:
