Ռուսաստանում մարդու իրավունքների պաշտպանության վիճակը ու ռուսական արտաքին քաղաքականության քայլերը կդառնան Ջեքսոն-Վենիկի որոշման փոփոխման ժամանակ քննարկման լուրջ առարկա: Ինչպես հաղորդում է «Ազատություն» ռադիոկայանը, այս մասին մարտի 15-ին հայտարարել է ԱՄՆ ամենահեղինակավոր սենատորներից մեկը:
Սենատի ֆինանսական հարցերով կոմիտեում քննարկման առարկա է դառնալու Ջեքսոն-Վենիկի որոշման ուղղումը: Այս անվանումով օրենքն ընդունվել է 1974 թ.: Ֆինանսների կոմիտեի ղեկավար դեմոկրատ Մաքս Բոկուսը նախազգուշացրել է, որ առանց որոշման փոփոխման (մինչ Ռուսաստանը ամռանը կանդամակցի ԱՀԿ-ին), ամերիկյան ընկերությունները կարող են հետ մնալ Ռուսաստանի` Չինաստանի ու Եվրոպայի երկրիների հետ առևտրի ծավալներից:
«Մենք պետք է Ռուսաստանի հետ հաստատենք առևտրային նորմալ հարաբերություններ, որպեսզի ամերիկյան արտահանող ընկերություններին մատչում տրամադրենք աճող ռուսական շուկային: Եթե Կոնգրեսը նման ռեժիմ ընդունի, ապա ամերիկյան արտահանումը Ռուսաստանում 5 տարում կկրկնապատկվի: Եթե ոչ, Ռուսաստանն ամեն դեպքում կանդամակցի ԱՀԿ-ին, այդ ժամանակ էլ ամերիկյան գործարարները կպարտվեն չինացի ու եվրոպացի մրցակիցներին»,- ասել է նա:
Ֆինանսական կոմիտեի հեղինակավոր անդամ Ջոն Քայլը վրդովված հակադարձել է` հայտարարելով, թե Ջեքսոն-Վենիկի փոփոխության հրաժարումն ու ամերիկա-ռուսական հարաբերությունները այնքան էլ հեշտ չեն, ինչպես թվում է: Նա հիշեցրել է, որ Ռուսաստանը, ի տարբերություն ԱՄՆ-ի, այդպես էլ չի վավերացրել ներդրումների երկկողմ համաձայնագիրը, որն արտերկրի գործարարներին իր տարածքում կերաշխավորեր ռուսական իշխանությունների կողմից ունեցվածքի բռնագանձումից:
Քայլն ասել է, որ ռուս-ամերիկյան առևտրային հարաբերությունների նորմալացումը պետք է մի քանի պահանջների բավարարի: «Թեև ազատ ներգաղթը Ռուսաստանից այլևս խնդիր չէ, սակայն Ռուսաստանում ահռելի չափերի են հասնում մարդու իրավունքների ոտնահարման խնդիրները, որոնք այսօր էլ արդիական են, ինչպես տասնամյակ առաջ: Իրավական խնդիրները չեն կարող դիտարկվել մեր տնտեսական հարաբերություններից առանձին, հատկապես դրա չարաշահման ակնառու դեպքերը, որոնք վերաբերում են ռուս քաղաքացիներին: Օրինակ` Սերգեյ Մագնիտսկու` երիտասարդ իրավաբանի գործը, որը կտտանքների է ենթարկվել, հայտնվել ճաղերի հետևում ու բանտ ընկել միայն այն պատճառով, որ փորձել է բացահայտել ռուսական բարձրաստիճան պետական մարմինների շրջանում տիրող կոռուպցիան»:
Հենց երեկ` գործի լսումների օրը, The Wall Street Journal-ը հրապարակել էր ռուս ընդդիմադիրներ Գարի Կասպարովի ու Բորիս Նեմցովի հոդվածը, որտեղ վերջիններս համաձայնել էին Ջեքսոն-Վենիկի որոշման փոփոխության անհրաժեշտության հետ:
