Երևանի քաղաքապետի խորհրդական Ալբերտ Գևորգյանը հանդիպել է Հայաստանի Հանրապետությունում Չինաստանի Ժողովրդական Հանրապետության դեսպանատան առևտրատնտեսական հարցերով խորհրդական Գուան Գանգին և դեսպանատան առևտրատնտեսական կապերի գրասենյակի 2- րդ քարտուղար Վան Ցզի Խունին:
Ողջունելով հյուրերին ` Ալբերտ Գևորգյանը նշել է, որ հայ-չինական բարեկամական հարաբերությունները հիմք են հանդիսացել նաև երկու եկրների առևտրատնտեսական կապերը ընդլայնելու և մի շարք ծրագրեր Երևանում իրականացնելու համար: Քաղաքապետի խորհրդականը Երևանի քաղաքապետ Տարոն Մարգարյանի անունից շնորհակալություն է հայտնել Չինաստանի կառավարությանն ու անձամբ Գուան Գանգին`նվիրատվության կարգով Երևանին հատկացված շտապ օգնության մեքենաներ և չինական ավտոբուսներ տրամադրելու գործընթացին նպաստելու համար:
Գուան Գանգն իր հերթին շնորհակալություն է հայտնել սերտ համագործակցության համար և ընդգծելով, որ Հայաստանը hամարում է իր երկրորդ հայրենիքը, խոստացել է շարունակել նպաստել հայ-չինական բազմակողմ կապերի ամրապնդմանն ու այդ համատեքստում նոր, համատեղ ծրագրերի իրագործմանը:
Հայ-չինական առևտրատնտեսական հարաբերությունների զարգացման և ամրապնդման, Հայաստանի Հանրապետությունում և հատկապես Երևան քաղաքում բազմաթիվ տեխնիկական ծրագրեր իրականացնելու համար Գուան Գանգը պարգևատրվել է Երևանի քաղաքապետի շնորհակալագրով:Այս մասին «Առաջին լրատվական»-ին տեղեկացնում են Երևանի քաղաքապետարանի տեղեկատվության և հասարակայնության հետ կապերի վարչությունից:
