Մարտի 1-ի բացահայտման ուղղությամբ բացահայտումներ պետք է իրականացնել, ոչ հանրային լսումներ: «Առաջին լրատվական»-ի հետ զրույցում նման տեսակետ հայտնեց Մարտի 1-ի Փաստահավաք խմբի անդամ Անդրանիկ Քոչարյանը`անդրադառնալով ԵԽԽՎ Մոնիտորինգային կոմիտեի համազեկուցողներ Աքսել Ֆիշերի և Ջոն Պրեսկոտի հայաստանյան այցի ժամանակ ՀՀ նախագահ Սերժ Սարգսյանի այն առաջարկին, թե անհրաժեշտ է մշակել հայեցակարգ՝ մարտի 1-ի սպանությունների վերաբերյալ անցկացնելու հանրային լսումներ քրեական հետաքննության արդյունքների վերաբերյալ:
Ա. Քոչարյանի համոզմամբ` հանրային լսումներ անցկացնելու կարիք չկա, որովհետև չորս տարվա ընթացքում բազմիցս եղել են հանրային լսումներ տարբեր մակարդակներում`մամուլի, հեռուստատեսության, հանրահավաքների, տարբեր տեսակի բացահայտումների, զեկույցների ձևով: Ըստ նրա` լսումները պերմանենտ կարող են շարունակվել, բայց դրանք իրավական հետևանք երբեք չեն կարող ունենալ: «Ուրեմն պետք է իրականացնել բացահայտում, այլ ոչ լսում: Լսումներ կարող են իրականացնել հասարակական կազմակերպությունները, բայց իշխանությունը, որի ձեռքում է գտնվում ամբողջ իրավական, արդարադատական համակարգը ` ոստիկանություն, ներքին գործեր, ազգային անվտանգություն, դատախազություն, պարտավոր է իրականացնել բացահայտումներ, այլ ոչ լսումներ»,- մեկնաբանեց Ա. Քոչարյանը` հավելելով, որ իշխանությունը լսումներ անելու առաջարկով ասում է, որ իրենք ըստ էության իրականացնում են պարզապես իմիտացիա:
Նրա կարծիքով` լավ կլիներ, որ ՀՀ իշխանությունները իմիտացիոն բնույթի առաջարկների փոխարեն ցույց տային` ինչու մինչև հիմա իրավական համակարգը ի վիճակի չի եղել իրականացնել Մարտի 1-ի սպանությունների լիարժեք բացահայտումները:
«Պետք է իրավապահ համակարգին պարտադրել, որպեսզի իրականացնեն Մարտի 1-ի լիարժեք բացահայտումներ, և մեղավորները բոլորը ստանան իրենց արժանի պատիժը` սկսած Ռոբերտ Քոչարյանից, Վարդան Օսկանյանից վերջացրած Տիգրան Թորոսյանով: Երբ բոլոր մեղավորները կստանան իրենց արժանի պատիժները, կարելի է մարտի 1-ի էջը փակված համարել»,- եզրափակեց Մարտի 1-ի Փաստահավաք խմբի անդամ Անդրանիկ Քոչարյանը:
