Ռուսական Regnum լրատվական գործակալության փոխանցմամբ՝ Ադրբեջանի իշխող «Ենի Ազերբայջան» կուսակցությունն (ԵԱԿ) իր բողոքն է հայտնել Գերմանիայի արտգործնախարար Գիդո Վեստերվելեի դեմ, ով մարտի 14-15-ին այցելել էր Ադրբեջան:
Բողոքի պատճառն այն է, որ Վեստերվելեն դռնփակ հանդիպումներ էր ունեցել ընդդիմության ու հասարակական կազմակերպությունների ներկայացուցիչների հետ: Այս կապակցությամբ ԵԱԿ-ի գործադիր քարտուղարի տեղակալ Մուբարիզ Գուրբանլին այսօր Միլի մեջլիսում (խորհրդարան) հայտարարել է.
«Ադրբեջանը համագործակցում և փոխադարձ այցեր է իրականացնում 125 երկրների հետ: Գերմանիայի արտգործնախարարը կարող է Բաքվում հանդիպումներ ունենալ թե՛ ընդդիմության, և թե՛ հասարակական կազմակերպությունների հետ: Սակայն նրանց հետ դռնփակ հանդիպումներ անցկացնելը չի կարող հավանության արժանանալ: Դա դիտարկվում է որպես Ադրբեջանի ներքին գործերին միջամտություն»:
