Կազանի բնակիչ 25-ամյա Սերգեյ Նազարովը, ով օրերս մահացել էր ոստիկանությունում բռնաբարվելուց հետո, ձերբակալվել էր առանց բավարար հիմքերի: Այդ մասին նշում են ռուսական լրատվամիջոցները` հղում անելով ոստիկանության Թաթարստանի քննչական կոմիտեից ստացված պաշտոնական տեղեկություններին:
Նախաքննության վարկածով` ոստիկանության «Դալնիի» բաժնի 25-ամյա տեղամասային տեսուչը, չունենալով բավարար հիմքեր, բերման էր ենթարկել գողության մեջ կասկածվող Սերգեյ Նազարովին: Հետո տեսուչը կեղծել էր փաստաթղթերը, որոնց համաձայն տղամարդը ձերբակալվել է թեթև խուլիգանության համար: ՌԴ քննչական գլխավոր վարչության քննչական կոմիտեի պաշտոնական կայքի տվյալներով, այժմ տեսուչը` Իլշատ Գարիֆուլինը ձերբակալված է: Նաև խոշտանգմանը մասնակից լինելու կասկածանքով ձերբակալված են բաժնի քրեական հետախուզության պետի տեղակալ Ալմազ Վասիլովը, ՔՀ բաժնի օպերլիազորներ Իլնար Իբատուլինը, Ռամիլ Ախմետզյանովը և Մարատ Սաբիրովը: Նախաքննական մարմինը նրանց կալանավորելու միջնորդություն է ներկայացրել:
Բոլոր կասկածյալները հեռացվել են աշխատանքից, ինչպես նաև պաշտոնանկ են արվել ոստիկանության «Դալնիի» բաժնի պետ Սերգեյ Եֆրեմովը, նրա տեղակալ Ֆաիլ Սաբիրզյանովը, ՔՀ բաժնի պետ Այնուր Ռախմատուլինը և ՆԳՆ Կազանի գործերով պետի օգնական, անձնակազմի հետ տարվող աշխատանքների գծով պետ Իլդար Քարիմովը:
Նախաքննության վարկածով, Սերգեյ Նազարովը ոստիկանության «Դալնիի» բաժին բերման է ենթարկվել մարտի 9-ին: Սակայն որոշ ժամանակ անց շտաբ օգնություն են կանչել` որովայնում ունեցած ցավերի պատճառով, իսկ մարտի 10-ին Սերգեյը հոսպիտալացվել է: Բժիշկներն արձանագրել են, որ նրա մոտ պայթել է ուղիղ աղիքը: Սերգեյը մահացել է մարտի 11-ին` վիրահատությունից հետո: Մահից առաջ տուժողը պատմել է, որ իրեն ոստիկանությունում բռնաբարել են փրփրագմփիկի (շամպայնի) շշով:
Առաջացած մեծ աղմուկի արդյունքում, բուքմեյքերական գրասենյակի նախկին գանձապահ, Կազանի 20-ամյա բնակիչ Ալյա Սադիկովան հայտարարել է, որ 2011թ. հունվարին իրեն ևս մի ամբողջ օր ծեծել են «Դալնիում», պահանջելով` ինքնախոստովանական ցուցմունք տալ գրասենյակի դրամարկղից գողություն կատարելու մեջ` սպառնալով, որ իրեն կբռնաբարեն շշով: Աղջիկն ասել է, որ ծեծին մասնակցել են օպերլիազորներ Ռամիլն ու Մարատը, իսկ Այնուր Ռախմատուլինը հետևել է: Սադիկովը հայտարարությունը տվել է քննչական կոմիտեում: Կատարվում է քննություն, փաստերը ստուգվում են:
Ըստ ռուսական լրատվամիջոցների պատրաստեց Էլմիրա Մարտիրոսյանը
