Ֆիլադելֆիայում ահաբեկչության ֆինանսավորման մեղադրաքով ձերբակալվել է տեղի բնակիչ, ծնունդով Ուզբեկստանից, 45-ամյա Բախտիյար Ջումաևը:
Ինչպես հաղորդում է Reuters-ը՝ վկայակոչելով FBI-ի տվյալները, Ջումաևը նյութական օգնություն է ցուցաբերում «Ջիհադի իսլամական միություն» խմբավորմանը, որը ԱՄՆ պետքարտուղարության կողմից դասվում է ահաբեկչական խմբավորումների շարքին: Նշվում է, որ Ջումաևը ԱՄՆ մեկ այլ բնակչի՝ դարձյալ ծագումով ուզբեկ Ջամշիդ Մուխթարովի մոտ ընկերն է. վերջինս ձերբակալվել էր 2012 թ. հունվարին ահաբեկչությանն աջակցելու կասկածանքով:
Մուխթարովի ձերբակալության ժամանակ հաղորդվում էր, որ նա Պակիստանում պատրաստվում էր միանալ «Ջիհադի իսլամական միության» զինյալներին՝ որոշ առաջադրանքներ կատարելու համար, ընդհուպ մինչև այնպիսիք, որոնք կարող էին նրա կյանքն արժենալ: FBI-ի կարծիքով Ջումաևը ֆինանսական աջակցություն է ցուցաբերել Մուխթարովին:
Հաորդվում է, որ մեղքն ապացուցվելու դեպքում Ջումաևին սպասվում է 15 տարվա ազատազրկում:
«Ջիհադի իսլամական միություն» խմբավորումը, ԱՄՆ իշխանությունների տվյալներով, իր առջև նպատակ ունի տապալել Ուզբեկստանի ներկայիս իշխանություններին և երկրի տարածքում հաստատել իսլամի օրենքների վրա հիմնված վարչակարգ: Բացի այդ, խմբավորումն իր վրա է վերցրել Աֆղանստանում ամերիկյան ռազմաբազաների վրա մի շարք հարձակումների, ինչպես նաև Տաշքենդում Իսրայելի և ԱՄՆ-ի դեսպանատների պայթյունների պատասխանատվությունը:
