Ֆլորիդա նահանգի Օրլանդո քաղաքի բնակիչը ստեղծել է ճշգրիտ կրկնօրինակն այն սարկոֆագների, որոնցում թաղել են հին եգիպտական փարավոններին: Այս գլուխգործոցի ստեղծման վրա նա ծախսել է 25 տարի:
Ինչպես պարզվել է, թոշակի անցնելուց հետո 89-ամյա Ֆրեդ Գենտերտը սկսել է մումիաների մասին գիրք կարդալ: Դա այնքան է հետաքրքրել տղամարդուն, որ նա որոշել է ստեղծել իր սեփական սարկոֆագը և կտակել է զմռսել իր մարմինը մահվանից հետո:
Գենտերտը գտնում է, որ նման հուղարկավորության մասին միտքն իր մոտ առաջացրել է սեփական ծննդյան տարեթիվը՝ 1922: Այդ թվականին Հովարդ Քարթերը հայտնաբերել է Թութանհամոնի դամբարանը:
«Ես հասկացա, որ դա ճակատագիր է»,- ասել է նա։
Թոշակառուի կինը` Ջոյսը, ամուսնու հետաքրքրությունը տարօրինակ է համարում, այնուամենայնիվ, շարունակում է նրան քաջալերել:
«Տարօրինակ է, որ նա անընդհատ մտածում է այդ սարկոֆագի մասին: Նա պարզապես ցանկանում է, որ մահվանից հետո բոլորը գնահատեն իր հոբբին»,- ասել է Ջոյսը։
