Գյուղացիներին տրամադրված վարկերից 2011 թ. ընթացքում չի վերադարձվել մոտ 200 մլն դրամի վարկ, որի դիմաց բռնագանձվել է մոտ 10 հողակտոր և այլ գույք (փոխադրամիջոց, անասուններ և այլն): Այս մասին «Առաջին լրատվական»-ի հարցմանն ի պատասխան հայտնեցին ԿԲ հասարակայնության հետ կապերի ծառայությունից:
ՀՀ բանկային համակարգի կողմից գյուղատնտեսության ոլորտին 2010 թ. ընթացքում տրամադրվել է 63.5 մլրդ դրամի, իսկ 2011 թ. ընթացքում` 90.5 մլրդ դրամի վարկ: Միայն 2011 թ. բանկերի կողմից տրամադրվել է ավելի քան 100 հազար հատ գյուղվարկ: 2011 թ. ընթացքում ՀՀ բանկային համակարգի գյուղվարկերի գծով հաշվեկշռից զուտ դուրսգրումները՝ 200 մլն դրամ, 2011թ. ընթացքում տրամադրված գյուղվարկերի (90.5 մլրդ դրամ) 0.2%-ն են կազմում: Ըստ ԿԲ-ի՝ դրամային և դոլարային վարկերի մարման միտումները գրեթե նույնանման են և էական շեղումներ չկան:
Հիշեցնենք, որ 2011 թ. ընթացքում ՀՀ կառավարության կողմից երկու փուլով իրականացվել էր 7.5-ական մլրդ դրամի չափով (ընդհանուր 15 մլրդ դրամի չափով) տրամադրված գյուղվարկերի համար տոկոսադրույքի սուբսիդավորման (4 և 6 տոկոսային կետի չափով) ծրագիր: Բացառությամբ «Մելլաթ» և ԲՏԱ բանկերի, մյուս բոլոր 19 առևտրային բանկերը տրամադրել են գյուղվարկեր:
