«Առաջին լրատվական»-ի զրուցակիցն է Հայաստանի լիբերալ կուսակցության նախագահ Հովհաննես Հովհաննիսյանը
-Պարոն Հովհաննիսյան, անցյալ տարեվերջին Հայ ազգային կոնգրեսի տարբեր ներկայացուցիչներ հայտարարում են, որ իշխանական բուրգը փլուզվում է, եւ որ արտահերթ ընտրություններն անխուսափելի են: Ձեր դիտարկմամբ` որքանո՞վ են իրատեսական այդ պնդումները:
-Այո՛, ընդդիմության ներկայացուցիչները բազմիցս հայտարարել են, որ այսօրվա իշխանությունները ասելիք ու անելիք չունեն, եւ իշխանափոխությունն անհրաժեշտ է երկրի ներքին եւ արտաքին խնդիրները լուծելու համար: Կա իշխանափոխության հասարակական ձեւակերպված պահանջ: Իշխանությունները, նկատի ունեմ` թե՛ օրենսդիր, թե՛ գործադիր, սպառել են իրենց քաղաքական գործունեությունը, եւ արտահերթ ընտրություններն ուղղակի անհրաժեշտություն են:
-Եթե կա հասարակական ձեւակերպված պահանջ, եւ իշխանությունները սպառել են իրենց, այդ դեպքում ինչու՞ են նրանք շարունակում պաշտոնավարել: Միգուցե ընդդիմությունը չունի՞ բավարար ռեսուրսներ` իշխանափոխություն իրականացնելու համար:
-Գիտեք, եթե Լեռնային Ղարաբաղի խնդիրը չի կարեւորվում իշխանությունների կողմից, ապա ընդդիմությունը գիտակցում է, որ ՀՀ-ի գլխավոր մարտահրավերներից մեկը ԼՂ հակամարտության կարգավորումն է: Եվ այդ հակամարտության խաղաղ կարգավորումն օրախնդիր հարց է: Իշխանությունը Լեռնային Ղարաբաղի հարցն օգտագործում է որպես շանտաժի միջոց: Սակայն պետք է մեր հասարակությունը գիտակցի, որ այսօրվա իշխանությունները վտանգ են ներկայացնում թե՛ Հայաստանի, թե՛ Լեռնային Ղարաբաղի համար եւ չպետք է տրվի այդ շանտաժին:
-Ըստ Ձեզ` Հայ ազգային կոնգրեսին որքանո՞վ է հաջողվում օգտագործել իր ներուժը, եթե նկատի ունենանք, որ այնտեղ ներգրավված են տարբեր կուսակցություններ, անհատներ, որոնք ունեն միանգամայն տարբեր պատկերացումներ: ՀԱԿ-ն այսօր կարողանու՞մ է ծառայել որպես հարթակ` տարբեր գաղափարների իրացման համար:
-Եթե օբյեկտիվորեն գնահատեմ, ապա կարոող եմ ասել, որ ՀԱԿ-ի ներսում կա մեծ ներուժ: Ի տարբերություն իշխանությունների, ՀԱԿ-ում հավաքված քաղաքական գործիչները կարող են իրենց գիտելիքներն ու փորձը ծառայեցնել մեր երկրին: Նրանք կազմել եւ հանրությանն են ներկայացրել երկրում բարեփոխումներին վերաբերող տարբեր ծրագրեր, սակայն այսօր ՀԱԿ-ը չունի այդ ծրագրերն իրականացնելու հնարավորություն: Այսօր էլ ՀԱԿ-ում շարունակվում են աշխատանքները տարբեր ծրագրերի վրա, որպեսզի իշխանափոխության դեպքում կարողանանք իրականացնել դրանք: Տարբեր կուսակցությունները ներկայացնող գործիչները` լինեն նրանք լիբերալ, թե սոցիալիստ` պետք է հասկանան, որ ՀԱԿ-ի նպատակը իշխանափոխությունն է:
-Առաջիկա շաբաթվա ընթացքում սպասվում է Եվրոպայի խորհրդի Մարդու իրավունքների հանձնակատար Թոմաս Համմարբերգի այցը Հայաստան: Հայտնի է, որ Թոմաս Համմարբերգը, ի տարբերություն եվրոպացի այլ պաշտոնյաների, 2008 թ. մարտիմեկյան դեպքերից հետո ՀՀ առաջին նախագահ, ընդդիմության առաջնորդ Լեւոն Տեր-Պետրոսյանի կողմնակիցներին անվանեց «քաղաքական հայացքների համար կալանավորված անձինք»` պահանջելով, որ, կա՛մ ապացույցներ ունենալու դեպքում նրանց գործերն ուղարկեն դատարան, կա՛մ նրանց ազատ արձակեն: Ըստ Ձեզ` այդ այցից հետո հնարավո՞ր է, որ իշխանությունները որոշակի զիջումների գնան եւ քաղբանտարկյալներին ազատ արձակեն:
-Ես շատ լավ գիտեմ, թե ինչպես են կառուցվում իշխանություն-միջազգային կազմակերպություններ հարաբերությունները, եւ ինչպես է երկիրը որոշակի զիջումների գնում իր պարտավորությունները չկատարելու դիմաց: Իհարկե, այս այցից հետո որոշակի փոփոխություններ կլինեն: Չմոռանանք, որ առաջիկայում սպասվում է նաեւ ԵԽԽՎ Հայաստանի հարցով համազեկուցողների այցը Հայաստան, եւ իշխանությունները չեն ցանկանա ներկայանալ քաղբանտարկյալների լրացուցիչ բեռով: Կարծում եմ նաեւ, որ եվրոպական կառույցների արձագանքն էլ այս անգամ կլինի ադեկվատ:
