Այսօր բրիտանական The Guardian-ը հրապարակել է Սիրիայի նախագահ Բաշար Ալ-Ասադի և նրա կնոջ նամակագրությունը, որից հայտնի է դառնում, թե ինչ վերաբերմունք է ունեցել Սիրիայի նախագահը երկրում տեղի ունեցող իրադարձություններին, ինչ օգնություն է ստացել դրսից` ապստամբներին ճնշելիս:
Այս նամակագրությունը թերթին է տրամադրել սիրիական ընդդիմությունը, որին հաջողվել է այն ստանալ ցանցահենների միջոցով: Նամակագրությունը վերաբերում է 2011թ.-ի հունիսից մինչև 2012թ.-ի փետրվար ընկած ժամանակահատվածին: Վերլուծելով դրանք ՝ թերթը եկել է եզրակացության, որ Ալ-Ասադը հաճախ դիմում է Իրանի օգնությանը և հետևում նրա ղեկավարության խորհուրդներին:
Մասնավորապես նամակներից մեկում Սիրիայում Իրանի դեսպանության խորհրդականը հորդորում է Բաշար Ալ-Ասադին «նախագահական ելույթներից մեկի լեզուն ավելի կոշտ և ուժեղ դարձնել, քանի որ մարդիկ պետք է զգան ուժեղ առաջնորդի ներկայությունը, որը կարող է պաշտպանել իր երկիրը»: Խորհրդականը նաև կոչ է անում հիշատակել բարեկամ երկրներին, որոնք աջակցում են սիրիական ռեժիմին:
Նամակագրությունից նաև պարզ է դառնում, որ Սիրիայի նախագահը ծաղրում է իր հնչեցրած բարեփոխումները, ինչպես նաև երրորդ անձանց օգնությամբ շրջանցում է իր նկատմամբ կիրառվող պատժամիջոցները: Մասնավորապես նշվում է, որ iTunes ծառայությունից նա կարողանում է երգեր ներբեռնել` օգտագործելով ԱՄՆ-ում երրորդ անձանց:
Նաև հրապարակվել է Ալ-Ասադի կնոջ` Ասմայի և Կատարի էմիրի դստեր նամակագրությունը, որում Կատարի արքայադուստրը կոչ է անում Ասմային համոզել ամուսնուն հրաժարական տալ և անվտանգ ապաստան գտնել Դոհայում և նոր կյանք սկսել այնտեղ:
The Guardian-ը նշում է, որ իրեն հաջողվել է ճշտել նամակների մի մասի իսկությունը, սակայն մյուսների իսկությունը հայտնի պատճառներով չի կարողացել ճշտել:
