Ադրբեջանական 1news.az-ը, վկայակոչելով ամերիկյան Wall Street Journal-ին, հայտնում է, որ հաջորդ շաբաթ Թուրքիան և Ադրբեջանը միջկառավարական համաձայնագիր են ստորագրելու TANAP (Անդրանատոլիական գազատար) նախագծի շուրջ: Այս մասին Քուվեյթ կատարած այցի ժամանակ հայտարարել է Ադրբեջանի էներգետիկայի և արդյունաբերության նախարար Նատիգ Ալիևը:
WSJ-ն գրում է, որ այդ նախագիծն ունի առանցքային նշանակություն Ռուսաստանից Եվրոպայի ունեցած էներգետիկ կախվածությունը նվազեցնելու տեսանկյունից: TANAP-ի ինքնարժեքը Թուրքիայում գոյություն ունեցող գազատարների ցանցի շնորհիվ բավական փոքր է Nabucco-ի համեմատ: Շահագործման հանձնելուց հետո TANAP-ի տարեկան թողունակությունը կազմում է 16 միլիարդ խորանարդ մետր գազ:
Ադրբեջանական կողմի պլաններով՝ 2025 թվականին դրանով պետք է փոխադրվի տարեկան մինչև 50 միլիարդ խորանարդ մետր ադրբեջանական գազ:
Հիշեցնենք, որ 2011 թվականի դեկտեմբերի 26-ին Թուրքիան և Ադրբեջանը փոխմբռնման հուշագիր էին ստորագրել TANAP-ի հարցում կոնսորցիում ձևավորելու համար:
