Զգուշացե՛ք արտասահմանում աշխատելու «բարի» առաջարկություններից

13 Հունվար, 2011 16:24

Դիտումներ՝ *

«Առաջարկում ենք աշխատանք արտասահմանում` բարձր վարձատրությամբ: Տեղափոխման բոլոր ծախսերը հոգում ենք մենք»: Նմանատիպ հայտարարություններ հաճախ կարելի է հանդիպել համացանցում, և քչերը չեն, որ մեծ բախտավորություն են համարում այն գտնելը: Զանգահարում են, փաստաթղթերը պատրաստում, իրերը հավաքում և մեկնում, իսկ թե ուր` իրենք էլ չգիտեն: Մեկնում են աշխատելու, որովհետև սոցիալական ծանր պայմանները ուրիշ ելք չեն թողել: Կազմակերպությունը, որը հրավիրում է աշխատանքի, իհարկե առաջարկում է «դայակի», «հավաքարարի» և նմանատիպ այլ աշխատանքներ, սակայն այն, ինչ թաքնված է սրանց թիկունքում, պարզվում է միայն այն ժամանակ, երբ էլ ոչինչ անել հնարավոր չէ: Հայտնվելով օտար երկրում, անօգնական վիճակում, որտեղ կանայք ենթարկվում են հիմնականում սեռական շահագործման, իսկ տղամարդիկ` աշխատանքային, նրանց մնում է կա՛մ մի կերպ վերադառնալ հայրենիք, կա՛մ վերջ տալ սեփական կյանքին: Առաջինը, սակայն, այնքան էլ հեշտ գործ չէ, որովհետև հավաքագրող «կազմակերպությունը» ամենևին էլ միամիտ չէ. նախանշված երկիր ժամանելուց հետո, նրանք ինչ-որ պատրվակով վերցնում են բոլոր փաստաթղթերը, և իհարկե, էլ չեն վերադարձնում: Իսկ երբ ուշքի ես գալիս, պարզվում է, ոչ մի կազմակերպություն էլ չկար¸ ընդամենը մի ժամով վարձակալված գրասենյակ էր:
Մարդու իրավունքների առավել նողկալի խախտումներից է այսօր հանդիսանում մարդավաճառությունը, որը չափազանց տարածված երևույթ է, կամ ավելի կոնկրետ` բիզնես ամբողջ աշխարհում: Հայաստանում մարդավաճառության տարածումը սկսվել է դեռ 1988-ից` պայմանավորված մի շարք գործոնների զուգակցմամբ` պատերազմ, երկրաշարժ, գործազրկություն և աղքատության աճ: Հայաստանի համար այսօր նպատակային է Թուրքիա, Միացյալ Արաբական Էմիրություններ, Հունաստան և Ռուսաստան մեկնող ուղևորների հանդեպ բացառիկ ուշադրությունը, իսկ վերջին 1 տարվա ընթացքում` ավելի շատ Արաբական Էմիրություններ մեկնող ուղևորների, քանի որ այստեղ ամենաշատն են մարդավաճառության դեպքեր բացահայտվում: